Cabuterra, su Tar arressat s'apaltu limba. "Sarda Itìnera non depiat bìnchere"

Su Tar Sardegna at annulladu sa gara de apaltu de agiudicatzione de s’ufìtziu de sa limba sarda de Cabuterra. Cun sa sentèntzia nùmeru 00293 de su 14.01.2015 su Tribunale Amministradu Regionale at acasagiadu su ricursu de s’assòtziu Sa Bertula Antiga e annulladu sa determinatzione cun sa cale su comune aiat declaradu binchidora sa ditta Sarda Itìnera Onlus de Stefano Meloni. Siat su comunu chi Sarda Itìnera sunt istados cundennados a pagare € 2500 èuros peròmine de gastos legales.

Su comunu, in sa protzedura de afidamentu de s’apaltu, aiat reconnotu a Sarda Itìnera elementos de capatzidade tècnicu-professionale chi non li pertocaiant. Difatis, su bandu prevediat chi, in sos annos, 2012-15 sa sotziedade depiat àere giai gestidu nessi 7 progetos. In tamen su Tribunale Amministrativu Regionale at tzensuradu Sarda Itinera ca in sa declaratzione fata dae s’assòtziu chi pertocaiat <su de àere gestidu contemporaneamente sete ufìtzios de sa limba sarda> no est istada capatza de lu proare.

In s’oferta de Sarda Itinera Onlus si atestat finas chi at gestidu 10 isportellos. Gasi chi, comente in tamen resurtat in sos atos, sos ufìtzios gestidos sunt petzi 6. S’oferta de Sarda Itinera Onlus, pro su comune, at bintu e depiat in tamen èssere escluida pro difetu e farta de sos rechisidos de capatzidade tècnica e professionale rechestos dae su matessi bandu de gara fatu dae s’amministratzione.

A s’època de s’apaltu, un annu como, assessore de sa limba sarda fiat Salvatore Lai (Rossomori).

Como tocat a s’amministratzione comunale a dare atuatzione a sa sentèntzia fata dae su collègiu ghiadu dae Caro Lucrezio Monticelli cun Giorgio Manca Cussigeri Estensore e Gianluca Rovelli, Primu Referendàriu. S’at a presentare apellu pro defensare s’apaltu dadu a sa Onlus o s’apaltu at a colare a Sa Bèrtula, istransende su perìgulu de un’àteru pretu pro dannos emergentes eventuales?