Una preparatzione a runda, belle totu in Sardigna sa chi ant aprontadu sos dirigentes de sa Dìnamo de Tàtari. S’iscuadra est galu a èssere formada ma s’ischit giai comente at a èssere su precampionadu, chi ocannu at a tènnere pro base su Geovillage de Terranoa. Su ritiru est dispostu pro su 25 de Austu e s’urtima proa innantis de comintzare su campionadu at a èssere su “Tzitade de Tàtari” in su PalaSerradimigni su 5 e su 6 de santugaine. Ocannu sa pre season est prus longa ca bi sunt sos Europeos e su campionadu nche comintzat a bia de mesu Santugaine. B’at iscuadras meda (Roma, Avellino, Siena, Varese, Galatasaray, Cantù, Brìndisi, e un àtera galu a seberare) chi ant a bènnere a Sardigna pro giogare contra a sos tataresos, e issos puru ant a mòere a Brìndisi pro unu Torneu.
In Sardigna su Bancu at a giogare 13 partidas in unu mese e at a girare carchi bidda che a S’Alighera, Padru e Casteddu, pro sa cuntentesa de sos tifosos chi no nche devent andare a continente pro sighire sa preparatzione de s’iscuadra sarda.