Si sos meses colados fìamus faeddende de fase 1, de fase 2 e 3 e finamentas de prima, segunda o de sa de tres undadas, a su presente paret chi sa chistione covid la siamus gioghende in duas partidas de fùbalu. Ma de cussas de Holly e Benji, malas a lòmpere a concruos. Sa prima partida est sa de sa Regione contra a s’Istadu; sa segunda sa de s’Istadu contra a sos colossos de su vatzinu. In sa prima partida sos tiros dae su cugione, sos passàgios traessos, sas paradas, sos contratacos, su bonu de sas bortas sunt atziones de gherra comunicativa eletorale intre sardo-leghismu e rapresentativa grogu-ruja. Pro no las elencare totu cantas, s’ùrtima pertocat sas tonalidades e sa Sardigna torra in zona arantzu. Su tzentru-dereta acusat a su Governu Conte de pensare a sa crisi sua e no a sa pandemia. Su tzentru manca acusat a sa Giunta Solinas de pensare a su rimpastu, a sos grupos consiliares noos e a su cda de Abbanoa e no a sa pandemia. E totu custu sena chi ambas fatziones iscant comente sarvare sanidade e economia. S’àteru disafiu pertocat sa frunidura de sas fialas pro nos immunizare. Sos privados, bene sustentados dae su pùblicu in antis (pro sa chirca) e a pustis (comporende·lis sas doses), non nos dant su chi nos diat dèvere tocare. Est ora de fruschiare tres bortas e de nde lis bogare sa botza a custas iscuadras.
Màuru Piredda
Leave a comment