Podemos, sas limbas e su deretu de sas natziones ibèricas

de Mauro Piredda

Su pòpulu grecu at seberadu, votende, de imbiare unu messàgiu craru a s’Europa de sos sacrifìtzios in palas de sos traballadores e de sas generatziones noas. Tsipras che a primu ministru e Syriza che a partidu chi at leadu su logu de su Pasok sunt su resurtu de annos e annos de cumbata sotziale contra a medidas semper prus graes chi ant petzi peoradu sas cunditziones de sa gente. Podet èssere (…podet èssere…) su comintzu de una mudada in sas relatziones intre sas classes.

Ma podet èssere finas su comintzu efetivu de una mudada in sas relatziones intre sas natziones. Syriza at sustènnidu sa campagna pro su “Yes” in Iscòtzia e pro sos iscotzesos sa bìnchida de Tsipras est de importu. Ma b’at àteru Ca a su chi narant sos analistas polìticos, in fatu de sa bìnchida de Syriza in Grètzia b’at a èssere sa de Podemos (de sa Gauche unie europeenne che a sos grecos) in un’àteru paisu Piigs: s’Ispagna.

Podemos est unu partidu chi punnat a s’indipendèntzia de sas natziones sena istadu? Nono. Reconnoschet su deretu a s’autodeterminatzione. Ma ischimus chi no est sa matessi cosa. In medas si sunt inchietados pro unas cantas decraratziones de Pablo Iglesias in sos cunfrontos de Artur Mas e de su partidu suo, CiU. In medas timent chi Podem (Podemos in Catalugna) potzat furare votos a sas diferentes listas pro indipendèntzia, a comintzare da sa manca de sa Cup.

Però sa bìnchida de Podemos podet èssere de giudu a su deretu de sos catalanos a s’ischertare dae s’Ispagna. Gemma Ubasart, Professora de Sièntzia polìtica in s’Universidade de Girona, responsàbile “plurinacionalidad” de Podemos e dirigente majorale de su partidu in Catalugna at cunfirmadu sa positzione de Iglesias: «Cherimus truncare sa majoria de su bi-partidismu istatale, ma finas sa de sos àteros partidos de sa casta comente CiU in Catalugna e su Pnv in su Paisu bascu». Ma at finas naradu a manera crara chi «mai finas a como unu partidu cun sa possibilidade de guvernare aiat difesu su deretu a s’autodeterminatzione».

«Emmo – at annantu –, finas Izquierda unida (àteru partidu de sa Gue) at reconnotu custu deretu, ma Podemos podet bìnchere». In cara de sa porfia intre indipendèntzia e tzentralismu «nois – at naradu Ubasart – creimus chi bi potzat àere una fòrmula pro chi sas diferentes natziones potzant istare còmodas in intro de s’istadu ma amus a defensare unu referendum che a su chi ant fatu in Iscòtzia».

E s’in casu su pòpulu catalanu rinùntziet a custu deretu? «Tando tocat a àere un’àtera optzione». Pro sa militante de Podemos tocat de «reconnòschere sa plurinatzionalidade, ca sa Costitutzione ispagnola non lu faghet. B’at una natzione e una limba chi istant in subra de sas àteras. Est pretzisu a reconnòschere sas limbas a su matessi livellu». Galu no est naradu chi Podemos potzat bìnchere. Si si diat votare oe nat-chi emmo. De seguru est una novidade de importu cunforma a su tzentralismu de su Pp e de su Psoe.

Amus a bìdere.