Oe su segretàriu nou de s’UDC sardu, a pustis de àere faeddadu de mìntere assessores noos in sa Giunta, at decraradu a su telegiornale chi bisòngiat nàrrere una cosa chi in pagos cherent ascurtare: cun su nucleare lìmpiu s’apretu de s’energia si podet sanare a sa lestra e chi est pretzisu pònnere custa medida in su PNRR regionale.
Su nucleare emmo, ma nemmancu unu soddu pro sas ferrovias. Semus abarrende sa Regione cun s’ùnicu cabu-de-logu de provìntzia sena trenu de sas FDS, sena una retza ferroviària elètrica, sena nemmancu una lìnia de velotzidade arta. E custu est un’esempru ebbia: b’at gente chi est isetende dinari pro disacatos mannos (fogos e disàrios), sa continuidade est unu bisu e setores in dificultade bi nd’at a muntones. Ma s’apretu est s’energia e s’idea ispantat ca in Sardigna de apretu pro s’energia non bi nd’at. Produimus su 40% in prus de su chi nos serbit e cun sos pannellos, s’eòlicu e sas àteras cosas chi sunt fraighende nd’amus a produire fintzas de prus. In prus sos sardos ant votadu prus de una borta pro non giùghere sas tzentrales nucleare in s’ìsula. Non bi nd’at bisòngiu e no las cherimus.
E tando pro ite imbolare in sas domos de sos ispetadores custa idea? Ca de su nucleare nd’at incumintzadu a faeddare sa parte polìtica italiana chi at prus possibilidades de bìnchere a sas eletziones de su 25 de cabudanni. Sos partidos sardos sunt incumintzende a nuscare s’àera de poderiu imbeniente e si sunt tramudende cun su bestire prus dèghidu pro si fàghere agatare prontos. E non sunt galu supridos sos polìticos italianos in Sardigna e sas listas non sunt nemmancu intregadas.
(redatzione)
Leave a comment