Pitzinnos minores semper prus in connessione digitale. Nointames sos cussìgios de s’ Organizatzione Mundiale de sa Sanidade (Oms) – collidads finas in sa Repùblica Italiana dae sa Sotziedade Italiana de Pediatria (Sip) – de non lassare impitare dispositivos digitales a sos piseddos chi tenent prus pagu de duos annos, cunforma a un’istùdiu reghente de s’Istitutu Superiore de Sanidade, in Itàlia su 22,1% de sas criaduras de 2-5 meses colant tempus in cara de unu visore (de televisore, elaboradore, tablet o telefoneddu), a su sòlitu prus pagu de un’ora a sa die. Su gradu de espositzione creschet cun s’edade: si si cunsìderat su tempus de impreu cumplessivu, chi andat dae prus pagu de un’ora a prus de tres oras, sa pertzentuale de pipios chi tenent un’esposiztzione a sos ischermos intre sos 11 e sos 15 meses de edade in mèdia nche lompet a su 58,1%, belle 3 supra de 5. Prus de unu criu subra de ses intre ùndighi e bìndighi meses est espostu a sos ischermos nessi un’ora a sa die, e su 3% pro tres e prus de tres oras a sa die. Custos sunt unos cantos datos de s’editzione XIV de s’ “Atlante de sa pitzinnia” in perìgulu in sa Repùblica Italiana, cun su tìtulu “Tempos digitales”, fatos connòschere dae “Save the Children”.
