E fintzas ocannu su mese de martzu nche lu semus acumpangende a s’interinada sua. Cras, prima die de abrile, est sa die de sas brullas. Gasi si narat. Ma s’orìgine no est crara. Nos contant chi sa cosa comintzet in s’antiga Roma cun sas festividades de Ilària ondrende a Tzibele, divinidade creadora e distrutora de sa natura. In època republicana, difatis, aprontaiant unos cantos giogos in onore suo: sos ludi megalenses. Ma si narat fintzas chi sa cosa potzat nàschere in Frantza cun s’Editu de Rossillione de su 1564. Sigomente a sos tempos de Càralu IX non b’aiat una data fissa de printzìpiu de annu (chie lu faghiat comintzare a Pasca de nadale, chie a Pasca de abrile, chie su 25 de martzu), tando sos guvernantes frantzesos disinneint sa data de su primu de ghennàrgiu. A pustis de custa mudada, chie sighiat a festare sos concruos de s’annu s’ùrtima chida de martzu fiat sugetu a brullas. Li poniant cantzone. Li naraiant poisson d’avril. E mancari in àteros logos non si faeddet de pische, su sentidu est su matessi. In Iscòtzia b’amus su Gowkie Day, sa die de su cucu, e sos chi retzint sas brullas sunt sos huntegowk. Brullas chi s’assimìgiant meda a sas chi nos faghiant a pitzinnos cumandende·nos de andare a butega pro comporare“un’etu de murru pistu” e cosigheddas che a custas. Cosa simigiante meda in Germània, in ue si narat «April, April, April, / Man kann den Narren schicken, wohin man will», giughende·nche su brulladu a totue cun cumandos impossìbiles. Sas brullas contemporàneas, imbetzes, sunt sas chi a s’ispissu si faghent tràmite sos mèdios de comunicatzione. Est nòdida sa de sa Bbc, su primu de abrile de su 1957, cun su servìtziu suo intituladu The Swiss Spaghetti Harvest, contende de un’àrbore de ispaghetis in Isvìtzera. E che a custas medas àteras bi nd’at àpidu e bi nd’at a àere. Ite amus a pòdere lèghere cras in sos giornales? Preparemus·nos.
mauro piredda
foto https://www.pexels.com/it-it/@enrique-grisales-911754/