Est chitzo pro nàrrere chi sa pandemia covid siat finida. Sas variantes noas de Omicron, pro more de sa capatzidade issoro de nche barigare finamentas sas immunidades cajonadas dae sas undadas antepostas de Omicron matessi, nos sunt faghende a bìdere una crèschida de sas ospidalizatziones in sos Istados unidos e in Sudàfrica. A su chi narat Enrico Bucci, unu de sos giornalistas scientìficos intre sos prus atentos a custos fenòmenos, «in s’istadu de New York custa crèschida est torra comintzende a pònnere suta pressione su sistema sanitàriu». «Comente resurtu de custa cosa – sighit Bucci – in cussu istadu nch’ant artziadu s’allerta a su penùrtimu livellu torrende a s’impreu de sas mascareddas in sos logos serrados e cussigende·las in foras, in presèntzia de tropèlios, pro sos sugetos fràgiles». Pro su chi pertocat s’Itàlia Bucci narat chi semus postos mègius finamentas pro more de unu tassu vatzinale prus artu, «ma, apompiende a sas cunsighèntzias de custas variantes chi s’ant a fàghere logu fintzas inoghe e pensende a sas chi ant a essire a campu in atòngiu, cheret chi nche l’acabbemus de nàrrere chi est totu finidu». S’apellu suo est pro chi sos mannos e sos fràgiles si vatzinent pro sa de bator bortas e pro chi b’apat unu monitoràgiu dèghidu: «tenimus bisòngiu de unu campione istàticu comente in Gtrandu Bretagna». Semper pro Bucci, imbetzes, est chitzo pro faeddare de pandemia in contu de pigota de sa moninca. «Finas a como – narat – su vatzinu pro sa pigota de s’òmine at neutralizadu sa minetza. De prus, b’at unu fàrmacu antivirale ispetzìficu giai aprovadu in Europa, su tecovirimat. A su presente custu est su chi ischimus. Cheret, dunca, chi lassemus a sos ispetzialistas su traballu issoro de previdire su potentziale pandèmicu de custa ispètzia noa isetende cun assussegu sos primos concruos».
màuru piredda
Leave a comment