Sa sotziedade Nothing at presentadu sa sèrie noa de telèfonos intelligentes de gamma mèdia, Phone (3a) e Phone (3a Pro), chi promitint de nche giùghere s’esperièntzia de s’impitadore a unu nivellu nou gràtzias a s’intelligèntzia artifitziale e a megioros mannos in su sistema de telecàmera.
A pustis de sa resessida manna de sos chi sunt bènnidos in antis, chi ant bèndidu prus de unu millione de esemplares, Nothing est chirchende de si cunsolidare in su marcadu cun custos duos dispositivos chi tenent unu disinnu chi los distinghet e caracterìsticas tècnicas avantzadas.
Fideles a s’estètica de sa marca cun sede in Londra, ambos duos modellos mantenent su disinnu trasparente caraterìsticu de Nothing, cun sas lughes icònicas Glyph chi oferint notificatziones e efetos visuales personalizabìles. De seguru b’at un’ evolutzione in sa calidade de sos materiales, cun unu telàrgiu de allumìniu retzicladu e una parte trasera de bidru (in tames de sa plàstica) chi dant una sensatzione prus agradèssida cando los tocas. S’istrutura interna l’ant torrada a disinnare pro otènnere un’echilìbriu mègius, e sas finiduras visuales las ant traballadas cun contivìgiu.
Sa dispositzione de sas telecàmeras est s’elementu estèticu chi diferèntziat de prus sos modellos. Phone (3a) tenet unu mòdulu astrintu, orizontale e illonghiadu in ue b’at tres telecàmeras, cando chi su (3a) Pro optat pro unu disinnu tundu dominadu dae una lente periscòpica poderosa. Custa diferèntzia no est estètica ebbia, ma refletit finas sas capatzidades fotogràficas superiores de su modellu Pro.
