Creschent sas campagnas de phishing in Itàlia. Custu giru sas trampas colant mustrend·si cun su marcu de sa prataforma de pagamentos de sa Pùblica amministratzione PagoPA. Sa protzedura previdet s’imbiu massivu de messàgios de posta eletrònica e de sms chi parent notìficas de santziones amministrativas (un’esèmpiu est su de sa violatzione de su còdighe de s’istrada) cun sos importos, sas iscadèntzias e unu nùmeru de pràtica. Sa punna est sa de fàghere pònnere sos datos de sa carta de crèditu in portales chi istorchent a minudu sa gràfica de su situ PagoPA.
Contra a su phishing non sunt mancadas mai sas campagnas de sensibilizatzione pro impedire a custos tramperis de nd’àere bonu profetu, ma sa resèssida de custas atziones, cun nùmeros galu artos, nos faghet a cumprèndere chi est un’iscuta a bi rùere. S’urgèntzia e s’emotividade de sos utentes sunt parte manna de su giogu, ma su peus si podet prevènnere sighende unos cantos inditos.
Sa prima cosa de fàghere est sa de verificare deretu su mitente (sas comunicatziones ufitziales de PagoPA, abbarrende in s’esèmpiu, movent dae indiritzos tzertificados comente noreply-checkout@ricevute.pagopa.it). Fatu fatu cheret chi pompiemus a sos Url in antis de clicare a sa tzega sos collegamentos ipertestuales presentes. In fines tocat a fàghere un’analizu crìticu de su messàgiu chi retzimus comintzende dae su tipu de comunicatzione impreada e dende cara a sos logos chi bi ponent, a sa formatatzione sestada, a sos errores de iscritura e gasi sighende. Però est beru chi non tocat a s’utente ebbia a dare atentzione, che chi esseret totu in palas suas. Cheret chi totu cantos sos atores interessados in custas prataformas istitutzionales collàborent e promovant una sinergia pro chi s’ecosistema digitale siat su prus seguru e afidàbile possìbile.
Gianfranca Orunesu
(Immàgine https://ccnull.de/fotograf/marco-verch)
Leave a comment