Sa gherra disisperada de sos abitantes de Masafer Yaffa, territòriu in sa parte meridionale de sa Tzisgiordània, pro difèndere su deretu de sighire a bìvere in ie, est su tema de su documentàriu No other land.
Sa pellìcula regollet materiale vìdeu giradu intre su 2019 e su 2023 dae duos palestinesos, Basel Adra e Hamdan Ballal, e duos israelianos, Yuval Abraham e Rachel Szor, totus ativistas contra a s’ocupatzione militare. Sas fortzas armadas de s’istadu giudeu ant istabilidu ca cudda est zona de esertzitatziones e dae dècadas oramai andant a in antis demolitziones e in sos ùrtimos annos atacos armados de sos colonos israelianos puru.
In realidade, comente est essidu a pìgiu dae documentos de s’esèrtzitu etotu, s’obietivu de a beru de Israele est firmare s’espansione de custas comunidades e s’ùnicu modu est a nche ddas catzare de su totu, privende·ddas de domos, iscolas e finas de s’abba.
A nos ghiare in custu biàgiu chi paret sena de peruna essida sunt Basel Adra paris cun su giornalista israelianu Yuval Abraham. Bidimus sas cunditziones de vida terrìbiles de custos grupos de pastores e massajos chi non si ghetant a terra e a de note torrant a fraigare a cua sas domigheddas chi sas ruspas ddis ant distrutu a de die.
Bidimus puru sas tragèdias chi at bìvidu sa famìllia de Adra e s’amighèntzia chi a bellu a bellu naschet cun Abraham, favorida dae sa connoschèntzia sua de s’àrabu. Fatu custu chi aiat atiradu annos in antis s’atentzione de sos servìtzios segretos de Israele chi dd’aiant propostu, otenende però una risposta negativa, s’arruolamentu.
Parte de sos filmados sunt istados fatos durante atziones de s’esèrtzitu e ant documentadu arrestos e finas mortes.
S’òpera, una co-produtzione palestinesa e norvegesa, ocannu est istada premiada cun s’Oscar pro su mègius documentàriu.
(gianni muroni)
Leave a comment