Peppa Vs Olìvia: faturadu de porcos in cartone animadu

-de Nicola Merche-

Sa fama de Peppa Pig est assegurada dae sa difusione, in totu su mundu, de custu cartone animadu pro pipieddos. Sa cuncurrèntzia però non si firmat e acanta a custu un’àteru porcu est intradu in domo: Olìvia the Piglet. Is pipios podent castiare sa TV totu sa die, is babbos e is mamas abarrant prus lìberos e su faturadu aumentat.

Sa làstima est chi de is cartones animados non si faghet su sartitzu, comuncas su dinari chi si movet gràtzias a custa sienda est de aici mannu chi si contat in milliones. Peppa est in is programmas de sa tv britànnica dae su 2004 e in cuddos de sa tv de Itàlia dae su 2010. S’interessu de is pipios pro is aventuras de custa eroina est prus mannu de annu in annu e aici e totu su faturadu de is siendas interessadas. Entertainment One est sa sotziedade canadesa chi in su 2015 s’aiat comporadu de sa Astley Baker Davies, cudda chi aiat imbentadu a Peppa, su deretu a si pigare sa parte manna de is intradas.

Est de pagu dies sa noa in su Financial Times chi sa eOne at refudadu s’oferta de 1 milliardu de isterlinas, fatu de sa ITV britànnica, ca at sutavalutadu is prospetivas de crèschida de sa sotziedade e su valore suo. Duncas sa tenta de sa Entertainment One est cudda de sighire ammanniende is interessos econòmicos suos.

Olìvia paret prus pagu populare de Peppa. Si castiamus in Youtube is puntadas in italianu prus famadas de Peppa ddas ant bidas prus de 17 milliones de bortas sa prima e casi 15 milliones de bortas s’àtera. Is chi ddas ant bidas prus pagu tenent comuncas una mèdia arta. Pro su chi ispetat a Olìvia non si podet nàrrere sa pròpiu cosa tantu chi de is puntadas chi si agatant sa prus famada in italianu dda ant bida 5 milla bortas. In inglesu, cun sa proportzione chi ddi ispetat, sa cosa non càmbiat meda ca sa puntada prus bida de Peppa dda ant castiada prus de 108 milliones de bortas mentras a cudda prus bida de Olìvia dda ant castiada casi unos 4 milliones de bortas.

Olìvia est de prus pagu annos chi si bidet in tv ca, Nick Jr in Itàlia e Nickelodeon in àteru logu, dda difundent isceti de su 2009. In su 2011 Chorion, sotziedade chi nde possediat is deretos, gràtzias a Olìvia aiat aumentadu is profitos suos de su 11% (The Guardian, 2011), comuncas, is deretos de Olìvia sunt passados de manu, difatis, Chorion in su 2011 at bèndidu a Classic Media chi ddos at torrados a bendere in su 2016 a NBCUniversal.

Chi siat Peppa o Olìvia a parte is profitos de sa tv tocat a cunsiderare puru is chi nde essint dae sa bèndida de libros, giogos a de cosa vària, duncas, is cartones animados e s’indùstria de s’intratenimentu in generale cumbenint meda ca is pipios si ammàchiant pro custos eroes e eroinas. Amus a bìdere a Peppa in sardu?