Immaginemus·nos un’iscena bantzighende·si intre un’iscenegiadura de Paolo Sorrentino e unu thriller polìticu de sèrie B: a un’ala su cardinale Christophe Pierre, missu apostòlicu cun sa passèntzia de unu màrtire e s’elegàntzia de chie ischit chi s’azienda sua subravivet a sos rennos dae duamìgia annos; a s’àtera, sos “astores” de su Pentàgonu ghiados dae Elbridge Colby, cunvintos chi sa diplomatzia siat unu giogu de Risiko in ue issos ant comporadu totu sos carros armados. Su coro de sa cuntierra no est una clàusola tècnica, ma sa pretesa totu americana de fàghere cumprèndere a su Paba non comente funtzionat custu mundu ebbia (chi, naradu gasi, diat fintzas torrare, sende chi “sa giustìtzia no est de custu mundu”) ma fintzas comente diat pòdere funtzionare su Vaticanu. Est custu su chi nde essit a campu a pustis de àere lèghidu custu artìculu. Cando Leone XIV s’est atrividu a criticare sa “diplomatzia de sa fortza”, sos funtzionàrios de sa Defensa no ant rispostu cun allegas teològicas, ma cun sa gràtzia de unu bulldozer in unu giardinu zen. Su momentu prus artu de custu surrealismu geopolìticu est lòmpidu cando sos istrategas a isteddos e istrìscias, forsis a pustis de una letura lestra de una pàgina istòrica de Wikipedia, ant mentovadu sos tempos de Avignone. Evocadu duncas su Treghentos pro torrare a nàrrere chi chie tenet sos drones detzidet fintzas chie tenet resone. Su messàgiu e su tenore suo sunt dignos de sos protagonistas: nois tenimus su poderiu militare, bois tenides petzi s’intzensu, duncas diais fàghere mègius a beneìghere sos interessos nostros imbetzes de istèrrere morale in contu de imperialismu. Sa cosa diat fàghere fintzas a rìere: cando chi in Washington sas istajones polìticas movent dae sos tziclos eletorales (next step mid term), in Roma su tempus est millenàriu. E puru Trump paret cunvintu chi sa fide devat èssere un’ufìtziu distacadu de su Dipartimentu de Istadu. Ma no li bastant sos telepreigadores evangèlicos? Ah, no.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment