Patrimòniu Unesco, sas Domus de Janas candidadas

Sas Domus de Janas de Sardigna si podent candidare pro s’iscritzione in sa lista de su patrimòniu mundiale de s’Unesco. L’at disinnadu sa Cummissione natzionale de s’agentzia de s’Onu pro s’educatzione, s’iscièntzia e sa cultura acollende sa proposta de su ministru Gennaro Sangiuliano. Custa candidadura l’ant a sutapònnere a s’esame de sos organismos consultivos de su Comitadu pro su Patrimòniu mundiale e, su 2025, a sa valutatzione de su Comitadu de sa Cunventzione de su 1972. «Custos 26 giassos rapresentant una testimonia istòricu-culturale de grandu valore universale», at naradu Sangiuliano. S’idea naschet dae s’assòtziu Centro Studi Identità e Memoria-Sardegna, cun s’agiudu de sa Regione Sardegna, de sa rete de sos Comunes de sas Domus de Janas e de sos 37 entes interessados in su progetu. Custos 26 giassos identìficant un’època de grandu importu in s’istòria sarda dae su de chimbe a su de tres millènnios in antis de Cristos. Presidente de su Cesim est sa Professora Giuseppa Tanda, ordinària de Preistòria e Protoistòria in s’Universidade de Casteddu, diretora de su Cippm (Tzentru interdipartimentale pro sa Preistòria e sa Protoistòria de su Mediterràneu) e, finas a su 2012, de s’Iscola de ispetzializatzione in Benes archeològicos de sa matessi Universidade. At publicadu unos 200 traballos in totu, prus de 70 in contu de Domus de Janas.