Cando martis su giùighe egitzianu at decraradu chi Patrick Zaki fiat cundennadu a àteros trèighi meses pro àere ispartzinadu noas fartzas a subra de su guvernu autoritàriu de su generale Al-Sisi, s’imprenta italiana e europea s’est chesciada pro sa prepotèntzia. Sa die a pustis, pròpiu su generale, at dadu sa gràtzia a s’istudiante italo-egitzianu isorvende sa situatzione complicada chi oramai andaiat a dae in antis dae annos in una manera chi faghet cuntentos a totu cantos. S’Itàlia at sarvadu sa vida de su tzitadinu suo; s’Egitu at ammustrados sos mùscolos a sa comunidade internatzionale e Zaki podet ghirare a Itàlia.
Sa libertade est s’agabbu de una chistione inghitzada in su freàrgiu de su 2020. Zaki su sete de cussu mese, est istadu arrestadu dae sos servìtzios segretos egitzianos in s’aeroportu de su Càiru. Torturadu pro duas dies e fintzas a s’oto de nadale de su 2021 mantesu in presone. Su protzessu est semper istadu dèbile, ma dae deretu fiat craru chi isse fiat paghende s’atividade polìtica e sotziale sua contra a sa ditadura militare de Al-Sisi. S’ùnica acusa chi l’ant cuntestadu pertocaiat un’artìculu chi isse aiat iscritu in ue faeddaiat de sa persighida de sos cristianos coptos in Egitu.
Sa chistione Zaki beniat bator annos a pustis de sa morte de Giulio Regeni, su chircadore italianu chi in Egitu aiat pèrdidu sa vida pro neghe, si pensat, de sos servìtzios segretos egitzianos. In ambas duas sas acontèssidas unu rolu de importu bi l’at su guvernu autoritàriu de Al-Sisi pigadu a su poderiu a pustis de s’agabbu malu de sos beranos àrabos.
Gabriele Tanda
Leave a comment