Tres annos a como tzucaiat sa protesta de sos pastores pro su prètziu de su late: sos resurtos sunt istados bonos, ma bènnidos a trigadiu e andados a chitzo. Su prètziu est pigadu pro un’annu, prus o mancu, e como sunt ismanniados totus sos gastos de su pastoriu, gasi meda chi ant cantzelladu cale si siat conchista.
Sas dificultades sunt crèschidas in custos meses pro neghe de sas bulletas prus caras meda e de sa mannària de su prètziu de su mangime, ma como si nche est ponende fintzas sa farta de s’abba proina. Est dae duos meses chi non falat unu gùtiu dae su chelu, sos sartos si sunt torra sichende e sos massajos sunt abbende pro non frundire su semenadu. Dificultades chi sunt interessende fintzas un’azienda manna comente s’Arborea.
Pro custas resones sos pastores ant seberadu de torrare a protestare su lunis imbeniente a sas ses de sero in su ponte de sa 131dcn intre Bitzi e Sòlogo cun cale si siat màchina agrìcula.
(redatzione)
Leave a comment