Pascale Dessanai, unu reberde in s'umbra

                    ‘Un ribelle nell’ombra. Vita e opera di Pasquale Dessanai’ (“Unu reberde in s’umbra. Vida e òpera de Pascale Dessanai”). Est unu libru de Giancarlo Porcu, publicadu dae “Il Maestrale” e    binchidore de su prèmiu  “Tullio De Mauro”. L’ant presentadu in s’ex Cumbentu de sos Caputzinos de Cuartu Sant’Aleni, in intro de sa rassinna ‘ViaConvento – Conversazioni su libri sardi’ (ViaConvento- Arresonadas subra de libros sardos) promòvida dae s’amministratzione comunale   e programmada pro beranu de su 2024.

                           S’istùdiu de Giancarlo Porcu pertocat Pascale Dessanai (Nùgoro 1868 – Uras 1919), poeta in duas limbas (sardu/italianu), anàrchicu e sotzialista, chi a giòvanu at connotu mamentos de glòria literària, comente atestant pessonàgios de sa  mannària de  Gràssia Deledda e Bustianu Satta. In su  1900 nche l’ant postu in presone pro “apologia de regitzìdiu”. Dae tando at a èssere unu “suversivu” bardadu a distintu dae su Casellàriu Polìticu Tzentrale.

      S’autore  at giai dedicadu àteras monografias  a sa  traditzione poetica sarda, comente “Régula castigliana” e “Le canzoni di Pisurzi” .  Si dividit intre sa  professione de curretore e sa de   filòlogu e crìticu literàriu. In custa ùrtima beste at finas analizadu testos in italianu e in sardu de autores comente Giulio Angioni, Sergio Atzeni, Gràssia Deledda, Frantziscu Màsala, Pepinu Mereu, Giorgio Todde.

                      Durante sa presentada ant arresonadu  cun s’autore Mariantonietta Piga, giornalista e esperta de limba sarda, e Maurizio Virdis, giai Ordinàriu de Filologia romanza in s’Universidade de Casteddu.

(sa redatzione)