Pro chie cheret bènnere in Sardigna, e no at sa residèntzia inoghe, bolu o nave sunt una sagnia de dinari: bènnere in s’ìsula nostra costat cantu andare a fora de Itàlia e, pro carchi cumpannia, fintzas de prus chi non barigare s’otzèanu e andare a un’àteru continente.
Est una crèschida de prètzios chi non si cumprendet. Si est neghe de sa gherra e de sos gastos prus mannos pro sa benzina, tando cada bolu depet sighire custa règula, ma, amus bidu chi gosi no est. Podet èssere neghe de sas tassas prus artas, ma tando fintzas àteras tratas a intro de s’Istadu depent tènnere una crèschida gosi manna de sos prètzios.
Forsis est ca s’agiudu de s’Istadu est tropu bàsciu e tando, pro torrare in sos gastos, sas cumpannias àrtziant sos prètzios? Ma si gosi est, pro ite sas cumpannias non si sunt chesciadas a dae in antis? Pro ite ant partetzipadu a su bandu connoschende sos critèrios? O forsis est una proa pro pònnere in pidinu sa polìtica e sos setores chi dipendent dae sos biagiadores? Sa punna cal’est?
S’impressione est chi custu giogu, chi torrat oramai dae annos medas, non siat ligadu dae carchi acontèssida particulare (gherra o pandemia), ma chi siat un’istrategia de sos vetores pro sighire a si pònnere de acordu e otènnere carchi cosa in prus dae sas istitutziones a pustis de unu bandu chi non l’est agradadu. Unu giogu chi divenit unu giuale pro aziendas sardas chi non podent ammanigiare su benidore issoro.
(redatzione)
Leave a comment