A pustis de chimbe partidas bìnchidas cun atza e capatzidade de ammanigiare sos aversàrios, eris sa Dìnamo Tàtari at pèrdidu contra a Varese. Prus o mancu duos meses a como aimus iscritu chi s’iscuadra de Massimo Bulleri pariat atata e in una situatzione de dificultade cun s’arriscu de falare in sa zona perigulosa de sa classìfica. Como su contu est diferente: a pustis de chimbe bìnchidas e cun una voluntade de si nde pesare dae s’imbaddìngiu chi l’aiat corfada, s’arressada de eris tenet unu sabore rànchidu. Non tantu pro sa pèrdida, ma pro sas ocasiones lassadas andare.
Difatis ocannu est istada un’istajone faddida, ma chi podiat andare meda mèngius si dae s’inghitzu sa dirigèntzia aeret fatu sèberos diferentes. S’allenadore, prima de totu, ma fintzas sa còmpora de carchi giogadore chi non fiat in su rolu suo e chi at àpidu bisòngiu de tempus in prus pro intrare in sos ischemas. Como sa Dìnamo est belle sarva cun oto puntos dae sa tertzùrtima positzione e cun tres partidas dae s’agabbu, ma fintzas cun ses puntos dae sos playoff. Si est complicadu pigare cussos duos iscalinos chi dae deghe la fatant colare a sa positzione de oto, bisòngiat chi si tèngiat a contu in custas tres partidas. Sos aversàrios sunt totu cantos in sa parte arta de sa classìfica e sunt lutende pro si conchistare sos logos bonos pro tzucare a su mèngius sa cursa iscudetu.
Cun Varese sa partìda, in fora de domo, est istada pèrdida pro chimbe puntos, ma s’iscuadra lombarda, chi est lutende pro si sarvare, at giogadu cun una mìria prus manna dae sos tiros dae a tesu e cun un’aficu prus mannu in defensa. Varese at coladu totu sa partida in dae in antis, e lutende pro cada botza; sa Dìnamo dae s’ala sua no l’at mai lassada andare tropu a largu e in s’agabbu at proadu su corfu, sena bi renèssere. Unu match chi però at ammustradu s’iscuadra sarda in salude e abbista.
Gabriele Tanda
Leave a comment