Sa Torres, torrada a nàschere dae su 2017, tenet sa punna de lòmpere a sa sèrie B, unu sònniu, chi como paret semper prus a curtzu, ma chi no achipit dae cando est nàschida.
S’iscuadra de Tàtari s’annu coladu est istada prima de su campionadu de sèrie C, grupu B, pro tempus maicantu cun partidas ispassiosas e unu giògu bellu, un’istajone ispantosa, ma in su momentu prus dìlighu no est renèssida a mantènnere sa conca frita e a serrare in s’ùnica positzione chi li podiat permìtere de colare a sa sèrie prus arta sena giogare sos playoff (unas cantas partidas a eliminatzione dereta pro conchistare s’àteru giassu in B). Cando sunt inghitzados sos playoff s’istrachidùdine de un’iscuadra isporada dae sa delusione no ant permìtidu de bìnchere.
Ocannu sa classìfica faeddat, e narat de una Torres semper in artu (sete puntos dae sa prima) e cun resurtos ispantosos, ma prus pagu lùghida a cunfrontu de su 2023/24, cun su campu chi ammustrat, difatis, a dies unu giògu bonu, e àteras dies sena atza. In prus b’at s’Entella, sa cabu-lista, chi at pèrdidu petzi una borta; e sa Ternana, sa segunda, chi tenet s’atacu e sa defensa mègius de su campionadu. In su girone de andada sa Torres a pèrdidu cun sa prima e paregiadu cun sa segunda. Totu podet galu capitare ca sos disafios cun custas duas ant a èssere a s’incumintzu e s’agabbu de martzu, ma s’ispera de sos amantes de sos tataresos oramai est in sos playoff.
Oe contra a su Gùbbio sa Torres fiat in die trota. Una partida afrontada in manera cautelosa, cun unu giògu de defensa e cun pagas atziones de atacu. Cun Fishnaller, su giogadore cun prus retzas, chi oe no at achipidu a nde sinnare. «Sos aversàrios ant merèssidu», at decraradu s’allenadore, «sunt bènnidos a Tàtari pro giogare cun intensidade e ant fatu una partida bona.» Alfonso Greco at ammìtidu fintzas chi sa Torres depet fàghere de prus. E tenet resone, mescamente cun iscuadras in mesu a sa classìfica, sos resurtos e sa mota depent èssere diferentes.
Gabriele Tanda
Leave a comment