de Maurizio Sale 
Una de sas paràulas chi s’impreant de prus in terra nostra, est “Sardu”.
Pagu prus o mancu in totue, sa gente ischit ite cheret nàrrere.
Est unu de sos faeddos prus impitados in logu de libru,de poesia,de publitzidade,e fintzas in logu de giornale e finas si custu est iscritu in italianu ebbia.
Totus , cando intendent custa paràula bi reventent a li dare unu sensu.
Est duncas universale, pighende pro universu sa terra nostra, siat craru.
Nemos si faddit cando l’intendet e mescamente niunu si faddit impitende.la.
Un’àtera paràula connota bastante est “Surdu” , totus nde connoschent su sensu e totus s’abbìgiant ca comente sonu, s’assimìgiat meda a cussa chi apo tzitadu dae in antis.
Sardu e surdu duncas diant pòdere èssere impreadas comente paràulas de sa Limba Comuna. E imbetzes nono!
Ca b’at semper calicunu chi si pesat a nàrrere: -nois li naramus “sadru”- o puru: -nois li naramus “saldu”e a chie no intendet, li naramus “suldu”!-
B’at de nàrrere duncas ca totus cumprendent su chi bolent nàrrere,custas duas paràulas, ma onniunu las diat chèrrere iscrìere a sa moda de bidda sua.
Como,non so un’istudiosu de Limba, ma chirca ca ti chirco , deo una paràula chi at su matessi balore in totue, l’apo agatada.
Unu faeddu chi si nche diat pòdere introduire finas in sa LSC, sena brigas o cuntierras.
Si diat dèvere finas pòdere pònnere, sena afannu perunu, a costàgios de sas àteras duas.
Sa paràula est custa : “Tontu”.
Tontu est aguale in calesisiat banda de sa Sardigna.
In calesisiat logu, s’iscriet a una manera ebbia e tenet unu e unu sensu ebbia.
Cussu!
Tzertu chi est curiosu a beru chi custa paràula chi nos acumonat, siat unu faeddu de orìgine italiana.
Cheret nàrrere ca issos , cando sunt bènnidos a su cumentzu de sa colonizatzione, la depent àere impreada medas bortas agatende.si cara a cara cun sos sardos.
Tando “sardu” e “surdu” non s’iscrient a sa matessi manera in totue, ma “tontu” , eja! Ergo , naraiant sos latinos , su sardu o su “saldu”, forsis no est a beru ca est “surdu” o “suldu”, ma “tontu” est bastante.
In Totue.
Sena duda peruna.
Leave a comment