Su 28 de martzu coladu su Papa at aprovadu sos votos de sa Cungregatzione de sas Càusas de sos Santos pro sa canonizatzione de Peter To Rot.
Dd’at a fàghere santu, e at a èssere su primu pro Pàpua Nova Guinea, su Contzistoru chi at a èssere cunvocadu cando ant a megiorare sas cunditziones de salude de su pontìfitze, essidu dae pagu dae s’ispidale.
Peter To Rot fiat unu catechista, nàschidu in Nova Pomerània, como Nova Bretagna, in su tempus chi sa Papuàsia fiat partzida in tres partes: cudda otzidentale, como Indonèsia, a su Regnu de sos Paisos Bassos, sa parte orientale a metade intre s’imperu Britànnicu e sa Germània. Su logu de nàschida de To Rot fiat duncas issara possedimentu tedescu.
In su 1942 sos giaponesos aiant ocupadu s’ìsula e aiant permìtidu, pro s’ingratziare sa populatzione, sa poliginia.
To Rot si fiat opostu a su cojuiu de un’òmine, giai cojuadu, cun ateruna fèmina. Pro custu motivu dd’aiant impresonadu.
Non fiat istadu, custu, s’ùnicu atu in difesa de sa fide catòlica e contra a sas polìticas de sos ocupantes. Difatis s’òmine, a pustis chi sos sordados nipònicos nd’aiant ghetadu sa crèsia, nd’aiat fatu un’àtera clandestina in su litu, in ue sighiat a tènnere su registru de sos sacramentos.
Postu in unu campu de cuntzentramentu pro prus de ses mese, a sa fine dd’aiant mortu cun un’inietzione letale.
Est una nova importante pro sa comunidade catòlica de s’istadu otzeànicu, minoritària in cunfrontu de sos protestantes e finas de sos animistas. In sa populatzione de sas alas de intro de s’istadu sighint a ddo’àere costumàntzias tribales e duncas traditziones religiosas paganas puru.
In su momentu de sa morte, su 7 de trìulas de su 1945, Peter To Rot teniat 33 annos. Fiat cojuadu e at tentu 4 fìgios, sos primos tres mortos a pipios piticos e s’ùrtimu nàschidu a pustis mortu issu.
Dd’aiat beatificadu, su 17 de ghennàrgiu de su 1995, Giuanne Pàule II.
(gianni muroni)
Leave a comment