Foto leada dae vaticannews.va
Oe domìniga 18 de maju a sas 10 in pratza Santu Pedru ant tzelebradu sa missa de intronizatzione de su pontìfitze Leone XIV.
Sa tzerimònia est cumintzada cun su cantu Tu es Petrus. Sa tzelebratzione eucarìstica fiat in latinu, cunforma a su Cànone Romanu, sas leturas fiant sa prima in ispagnolu, su salmu in italianu e sa segunda in inglesu, sas tres limbas prus connotas e usadas dae su Papa.
In sas duas limbas istòricas de sa Crèsia imbetzes, su latinu e su gregu, ant fatu sa letura cantada de su Vangelu.
A coa Leone XIV est istadu imbestidu de s’autoridade papale cun sos sìmbolos suos: su pàlliu de lana bianca, chi ammentat su ruolu de pastore de ànimas, fissadu cun tres agùgias chi rapresentant sos tres craos de Cristos, e s’aneddu piscatòriu, chi tenet pintada s’immàgine de Santu Pedru pischende cun sa retza.
In sa prèiga su pìscamu de Roma, a pustis de àere saludadu sos presentes, incruidos sos partetzipantes a su Giubileu de sas cunfradias, at naradu: «M’ant seberadu sena de mèritu perunu e timende e tremende bèngio a bois che frade…»
S’omelia est istada intzentrada in sa missione de sutzessore de s’apòstolu: «Amore e unidade: custas sunt sas duas dimensiones de sa missione afidada a Pedru dae Gesùs».
Pedru chi at tentu s’incàrrigu de piscadore de òmines e Pedru, pedra chi a subra sua est fraigada sa Crèsia. «Pedru depet pàschere sa gama sena de tzèdere mai a sa tentatzione de èssere unu condotieri solitàriu o unu capu postu a subra de sos àteros faghende·si mere de sas persones chi ddi sunt afidadas», at agiuntu.
De signalare, in su restu de sa tzelebratzione, sa preghiera de sos fideles cun sas leturas in portoghesu, frantzesu, àrabu, polacu e tzinesu.
A sa fine de sa missa, intradu in sa basìlica, su Papa at retzidu s’omenàgiu de capos de istadu, de guvernu e de rapresentantes diplomàticos, cumintzende dae sos italianos, dae sos peruvianos e dae sos istadunidesos. Intre custos fiat presente puru su frade mannu de su Papa, Louis Prevost, chi at abratzadu su chi est como Leone XIV.
(gianni muroni)
Leave a comment