Mauro Piredda
«Sa Sardigna est otzidentale e cristiana». Cale si siat cosa chèrgiat nàrrere custa fràsia (unu resurtu de un’indàgine istòrica e polìtica o su disìgiu de àere un’istadu sardu in intro de un’Europa cun raighinas cristianas e alas capitalistas), est pretzisu de nche la barigare paris cun sa porfia chi bi diat dèvere èssere intre otzidente e integralismu islàmicu. Ca sa parte manna de sos sardos at in intro de issa su mecanismu totalizante chi ambas partes ponent a cùrrere. Bidu a minudu: pro sos giadistas semus totus colpèvoles de èssere otzidentales (su nùmene “Boko Haram” est unu programma) e pro su pensu otzidentale cada musulmanu devet èssere lestru a nàrrere chi isse non b’intrat nudda cun su terrorismu ca si nono (Tfr docet) iscatat su “silenzio assenso”.
E custu mecanismu, tando, non connoschet làcanas: no est otzidentale, no est nemmancu orientale. Est su mecanismu de sas classes dominantes chi, a segunda de in ue dòminant, bestint sa giacheta o su turbante. Est unu mecanismu contra a sos migrantes chi fuint dae sa misèria imposta dae sos gioghitos intre sos chi amus mentovadu e acudint a inoghe cun s’istigma bene sestadu: dae potentziale delincuente a potentziale terrorista. Est unu mecanismu contra a nois etotu chi bidimus (cando non chircamus) s’inimigu in su migrante lassende a caddu sos guvernantes chi nos peorant sas cunditziones finas cun s’arriscu de cunsignare custa pòvera gente a àteras prospetivas. De su restu cando naramus chi «bi nd’at pagu finas pro nois» non leamus in cunsideru chie, comente e proite nos lassat sas farfarùgias ebbia.
Tando tocat de refudare finas su cuntzetu de gherra intre tziviltades. Ca sa cunsighèntzia prus grae de custu pensu est a cunsiderare su modellu nostru che a su mègius e sos atacos terroristas che a una reatzione tzertificada petzi dae su livellu de tzivilizatzione issoro. Custu caminu curtzu no agiuat a cumprèndere (o, peus, cheret evitare) unas cantas variàbiles polìticas, econòmicas e sotziales in sas relatziones internatzionales de s’edade contemporànea. B’at carchi campione de domo nostra (a dolu mannu prus de carchi) chi non faghet essire alenu in pitzu de sa Frantza matessi chi finantziat sos islamistas in Sìria; o – comente at ammentadu Vito Biolchini – de su Qatar chi finantziat ospidales sardos. Galu, tando, fundamentalismos chi si leant a manu tenta lassende a nois s’onere de seberare a cale campu apartènnere.
Lassende a banda sos crìmines de sas democratzias liberales peri su mundu (finas sos pitzinneddos ischint chi sas gherras movent pro amparare profetos) concruo cun unu meledu lestru in pitzu de sa libertade de espressione. Issa est una conchista sotziale, non petzi tzivile, ca cunsentit a sos oprimidos de s’organizare. E chie non cheret rùere dae su caddu otzidentale (burghesu e cristianu) si l’at a pònnere in suta de pees in cale si siat momentu.
P.s. Ma a nois sa libertade de nos espressare in sardu cale oriente nos la vedat?
Foto de Pepe Coròngiu
Leave a comment