Oe e cras su 26 e 27 cabudanni su Coordinamentu pro su Sardu Ufitziale addòbiat totu sos chi ant aficu pro s’idioma isolanu pro una manifestatzione de ispàssiu identitàriu a favore de su bilinguismu e de sa rinàschida de sa limba natzionale sarda.
Sas datas non sunt ghetadas a fainu: su 26 de cabudanni est sa Die Internatzionale de sas Limbas de s’Unione Europea e s’assòtziu de sos militantes de sa limba ufitziale l’at seberadu pro assodire sos ativistas, pro si faeddare cara a cara, pro cuntierrare in bonas, pro detzìdere sas lìnias de interventu comunas, ma finas pro si ispassiare e bostu. Non b’at a àere petzi polìtica linguìstìca e istandardizatzione de su sardu in su menù, ma finas mùsica, archeologia, pràngios e chenas sotziales, artisanadu, videos, mostras linguìsticas e de libros e meda cosa in prus chi sos organizadores sunt ammaniende in custas dies.
Sas duas dies sunt programmadas in Òschiri in sa sede de sa Fundatzione Giovanna Sanna in pratza Monsignor Bua. Si comintzat sàbadu 26 a sas 16.00 cun s’isterrida de Roberto Carta chi at acontare de sos resultos de su traballu de su CSU in un’annu. A pustis duas relatas de Giuseppe Corronca (Sa limba ufitziale sarda Lsc) e Manuela Ennas (Mèdias e polìtica linguìstica in Sardigna).
A sas 18.00 est prèvedida una mesa de arresonu polìticu subra sa polìtica linguìstica in Sardigna chi at mudadu unu pagheddu forma. At aderidu Fedele Sanciu (Forza Italia). B’est Joan Adell (rapresentante de su guvernu catalanu in Sardigna) in capas in cumpangia de Sam Abrams e est cunfirmada finas sa presèntzia de Efisio Arbau (Sìndigu de Ollolai e leader de La Base) e de Bustianu Cumpostu (Sardigna Natzione). Roberto Deriu (PD) imbetzes at dadu forfait. Giovanni Columbu (segretàriu natzionale Psd’Az), Mauro Pili (Unidos) e Christian Solinas (cussigeri regionale Psd’az) ant annùntziadu chi, pro impeigos improvisos, ant a bènnere a faeddare domìniga a mangianu.
A sas 20.00 b’est s’interventu faeddadu e cantadu de sa cantante Carla Denule. A sa fine chena sotziale.
Domìniga mangianu su 27, a sas 9.30 assemble-dibàtitu de su Coordinamentu pro su Sardu Ufitziale, coordinada dae Paolo Mugoni e Sarvadore Serra, aberta a totus cun in programma una filera de interventos e testimonias de de intelletuales, maistros, operadores, iscritores, poetas, ativistas e tzitadinos comunes. B’at a èssere su recuperu de sos interventos de Mauro Pili, Giovanni Columbu e Christian Solinas.
A sa fine, iscritura e aprovatzione de unu documentu polìticu subra sa netzessidade de una ufitzializatzione e istabilizatzione de su sardu che a limba ufitziale de sa Regione Autònoma de Sardigna.
A pustis, pràngiu sotziale e bìsita archeològica ghiada in limba sarda (a incuru de Giorgio Pala) in s’importante situ archeològicu de s’altare de Santu Istèvene.
In s’ìnteri de sas duas dies at a èssere possìbile a bìdere un’espositzione de libros a incuru de s’agentzia Manca, sa mustra “Catalanu, limba de Europa” (a incuru de su guvernu catalanu), unos cantos videos in sardu de s’autore Gianni Langiu e unos cantos produtos de artisanadu.
EST IMPORTANTE MEDA A si marcare a sa chena o a su pràngiu sotziale. Su RISTORANTE Bistro’ tenet su telèfono chi no andat. Podides cramare su nùmeru 320/4419557. O si nono bos podides marcare iscriende a s’e-mail: robcarta@hotmail.com.
Leave a comment