Òschiri: sa parlata "atzuda" de Cristiano Sabino

– de Cristiano Sabino –

Torro gràtzias a su CSU pro nos àere cumbidadu a custu atòbiu. Seis faghende unu traballu de importu mannu, a bortas fintzas a sa sola, batende a in antis sa pelea pro su bilinguismu e pro su sardu limba co-ufitziale de sa Sardigna.

Partimus dae unu puntu firmu: sa co-ufitzialidade est una de sas prus importantes peleas chi su pòpulu sardu depet fàghere pro si sarvare dae su disacatu de sa colonizatzione integrale. Chene limba non est possìbile a si nche emantzipare e ne mancu a pòdere pensare de si emantzipare.

Su Fronte Indipendentista Unidu sustenet in totu e pro totu sa polìtica de su CSU pro su bilinguismu, pro sa normatzione de sa limba istandard e contra a s’immobilismu de sa giunta Pigliaru chi est ruinende sas pagas cosas bonas de sos annos colados.

Su contributu meu at a èssere a manera ispetzìfica in pitzus de sa chistione de s’iscola, chi in custas dies coladas sos colonialistas, chi a dolu mannu nos guvernant, paris a sos amigos issoro chi si nche auto-narant fintzas “sovranistas”, e “de manca”, ant dimustradu un’àtera borta de ite pasta sunt fatos!

Unu presidente de sa Regione comente Pigliaru, chi narat chi no at impugnadu sa lege 107 (connota comente “buonascuola”) cara a sa “Corte Costituzionale” ca est una lege bona, o no ischit chi una lege podet èssere impugnada fintzas in sas alas malas (tando no ischit nudda de comente si guvernat e sunt belle totus dotzentes universitàrios!), o narat farsidades ca no cheret andare contra a sos meres issoro. Tando, ite depimus pensare?

Un’assessora comente a sa Firino, chi narat chi sos mastros disterrados sunt 10 ebbia, cheret mandada fora de su Guvernu, ca no ischit ne mancu de ite est faeddende e de comente funtzionat s’iscola, su “piano straordinario di assunzioni” e su “piano straordinario di mobilità”!

Non paret beru ma nos guvernant custas, fortzis sa peus classe polìtica de s’esperièntzia autonomìstica intrea!

A bos l’ammentades sa campagna eletorale “Cominciamo il domani” de su 2014?

“S’iscola prima de totu” naraiat Pigliaru! A bos l’ammentades su giassu web de s’universidade de Casteddu chi faghiat propaganda eletorale pro Pigliaru chene si nche birgongiare?

Oe amus unu professore universitàriu comente presidente, chi gastat paritzos milliones de èuros pro su progetu “Iscola”, chi de sardu – comente at giustamente nadu Maurizio Onnis – tenet su nùmene ebbia e non faghet nudda pro sarvare sos mastros sardos dae su disterru.

Sa realidade est custa. Pigliaru e sas fortzas chi li istant a indùrriu non tenent perunu interesse a sarvare s’iscola sarda e sos traballadores suos, e mancu a introdùere sa limba sarda in s’iscola, ca custu cheret nàrrere andare contra a su pòdere tzentrale de su partidu chi como est guvernende s’Istadu italianu: su PD.

Si aiant àpidu interesse a sarvare s’iscola, aiant reformadu s’istatutu ponende·li a intro sa tutela linguìstica comente la tenent sa Val d’Outa e su Südtirol; e sa RAS, sa die a pustis de su votu pro sa lege 107, diat àere aplicadu s’artìculu chimbe de su Istatutu Autonomìsticu, chi narat chi sa RAS podet “adattare alle sueparticolari esigenze le disposizioni delle leggidella Repubblica, emanando norme di integrazione ed attuazione in materia di istruzione di ogni ordine e grado”.

Imbetzes Pigliaru e sa Firino no ant fatu propriu nudda pro sarvare sos mastros e s’iscola sarda dae su disacatu de sa lege 107 e, pro nos leare pro su culu, ant postu s’arresonu in pitzus de s’iscola sarda su 22 de capidanne: custu cheret nàrrere ùndighi dies a pustis dae su tèrmine pro impugnare sa lege cara a sa Corte Costituzionale.

Meda gente narat chi sunt “incompetentes” ma no est de gasi. Custos sunt cumpetentes e faghent su chi lis cumandat s’Istadu issoro, ca issos obbedessint a isse ebbia e dae issos pigant sos privilègios feudales che a sos ispagnolos in su Chimbighentos e che a sos Piemontesos in su Setighentos.

Chie sighit a si delùdere pro custos o est unu cùmplice mascheradu dae crìticu, o no at cumpresu nudda de su rolu de sa Giunta Regionale in su protzessu de colonizatzione polìtica e culturale chi nos est iscantzellende dae sa cara de su mundu.

Pigliaru, Firino e sos àteros ischint bene cale est sa chistione, e pro custu non movent unu pòddighe: o si torrat a iscrìere s’istatutu autonomìsticu faghende comente sa Val d’Outa e su Südtirol, chi difatis non sunt tocados dae su “piano straordinario di assunzioni” de sa 107 (ca issos detzident totu su chi pertocat s’autonomia iscolàstica issoro e fintzas cantos mastros lis serbint), o sa Sardigna depet pònnere abbassare sa conca e si nche rassignare a sa ruina de su sistema iscolàsticu suo.

Pigliaru e Firinu ischint puru ca sena una lege regionale pro s’iscola sarda no est possìbile assùmere sos mastros chi nos serbint pro gherrare contra s’abbandonu iscolàsticu e pro fraigare unu sistema educativu chi naschet dae sos bisòngios nostros, ca sene su reconnoschimentu linguìsticu, sa Regione non podet tutelare sos mastros suos chi podent èssere cramados a insingiare in Itàlia.

Pigliaru e Firino ischint chi sa pelea pro un’iscola sarda est sa pelea pro introdùere sa limba comente limba sarda veiculare che a mesu de difusione de cultura e s’istòria sarda a s’ala de custa italiana, europea e de su mundu.

Sa pelea at a èssere prima de totu cuntzetuale e de cultura. Ite nos servit in Sardigna?

S’iscola italiana chi amus àpidu fintzas a oe, o un’iscola noa fraigada in pitzu de sos bisòngios educativos, formativos, pedagògicos e fintzas econòmicos de sos sardos?

Si nos bastat sa prima, tando tenet resone Pigliaru cun sa Firinu a de segus: non nos podimus chesciare de nudda. Segunde issos semus italianos e bo, e in Itàlia sa lege est su matessi pro totus sos chi sunt italianos (difatis sos sudtirolesos e sos valdostanos non si nche intendent italianos mancu pro nudda!).

Si semus italianos e bo, non nos depimus lamentare ne mancu chi nos disterrant a fora a traballare, ca sa Sardigna est isceti una “regione” comente sas àteras e custu sardu no est unu pòpulu a banda, ma una parte minoredda de s’italianu.

Tando, si cherimus sarvare s’iscola sarda e sos traballadores suos dae su disacatu (tenimus su tassu de abbandonu iscolàsticu prus mannu de s’Istadu) e dae su disterru, depimus pònnere sa chistione “iscola” in un’àtera manera e cumintzare una pelea manna pro reformare s’istatutu autonomìsticu e presentare una lege in pitzus de s’iscola sarda.

Ambas duas operatziones sunt de importu mannu e cherent fatas comente peleas tziviles dae totus su chi b’istant: movimentos polìticos, assòtzios culturales, traballadores organizados e nono, intelletuales e gasi sighende.

Bi sunt fintzas diversas propostas in su pratu! A bi la faghimus a ammanitzare una die pro arresonare de custas diversas propostas, agatare una sìntesi unitària e fraigare unu comitadu trasversale chi batat sas propostas non in sas istitutziones ebbia ma domo pro domo, prata pro prata, sardu pro sardu?

Leave a comment