OpenAI at dadu sa possibilidade a ChatGPT de bogare a pìgiu immàgines nativas ponende in campu unu sistema de generatzione cunforma a su modellu GPT-4o.
Sos resurtados sunt una cosa de non pòdere crèere e, sigomente podet isfrutare sa multimodalidade de su modellu, sa generatzione noa de immàgines resessit a sighire cun prus cuidadu sas rechestas a messàgiu lestru de s’impitadore e a iscrìere in manera meda pretzisa finas su testu in intro de su cuntènnidu gràficu.
Sa funtzionalidade est ativa in ChatGPT e finas in Sora (seberende Image in tames de Video in sa UI), e est a disponimentu de totu sos impitadores de Plus, Pro, Team e Free.
Calicunu at a contrapuntare chi ChatGPT podiat giai bogare a pìgiu immàgines, e giai est a beru, ma impreaiat unu modellu de foras, est a nàrrere DALL-E 3. In àteras allegas, in antis ChatGPT intregaiat su messàgiu de testu a uno modellu de generatzione de immàgines indipendente, cando chi como resessit a disinnare figuras noas isfrutende su matessi “tretu semànticu” impitadu dae su modellu multimodale GPT-4o.
Mancari chi in sa carta de sistema de sa funtzionalidade noa non l’apant craridu, est possìbile chi como GPT-4o resessat a amministrare token visuales separados, gasi comente podet fàghere cun sos token àudiu sa modalidade Vocale Avantzada. A diferèntzia de custa, però, sos “token visuales” convivent cun cuddos testuales de sa chat.
