B’at unu modellu nou de intelligèntzia artifitziale generativa de OpenAi, e si narat Gpt 4.5. Nos lu sunt presentende comente prus mannu e prus intensivu e, narant, a tretu de cumprèndere mègius sos chi sos utentes cherent ischire cun sos messàgios-prompt issoro. A como b’at un’anteprima pro sos chi diant chèrrere èssere parte de custa proa. E chi diant pòdere pagare 200 dòllaros su mese. No est cosa pro tous, duncas.
Su segretu suo diat èssere su de s’imparu non supervisionadu, cosa chi permitit su megioru de sas capatzidades suas de reconnòschere sos ischemas, de sestare connessiones e de ingendrare creatziones priva de arresonu.
«Sos primos test – leghimus in su situ de OpenAi – nos ammustrant chi s’interatzione cun Gpt 4.5 est prus naturale. Sa base sua de connoschèntzias prus ampra, sa mègius capatzidade de sighire sas intentziones de sos utentes e su cuotziente emotivu “eq” prus mannu nde faghent unu traste prus ùtile pro còmpitos comente su megioru de s’iscritura, sa programmatzione e sa risolutzione de problemas pràticos. Pensamus fintzas chi potzat àere allutzinatziones in mancu».
Sam Altman, ammistradore delegadu de OpenAI, faeddende de custu modellu nou at afirmadu chi «est su primu a mi dare s’idea de istare faeddende cun una persone premurosa. B’at àpidu momentos diferentes in ue mi so sètzidu in sa cadrea abarrende a buca aberta cando chi fia retzende consìgios bonos a beru dae parte de un’IA».
Mancari totu custas novidades e sas paràulas de cuntentesa manna, OpenAI matessi est narende chi custu modellu no est avantzadu pro totu sas operatziones. Mentovados sos test chi vàlutant sa capatzidade de arresonu lògicu e matemàticu. Sos livellos de unos cantos cuncurrentes sunt prus artos.
In fines, pro su chi pertocat sa seguresa, b’at de mentovare tècnicas noas pro reduire s’arriscu de impreos pagu dèghidos e prus serentes a sos intentos de sos utentes. «Nos auguramus chi custu traballu potzat èssere de agiudu pro alliniare modellos imbenientes galu prus capatzes».
Gianfranca Orunesu
(Foto de Markus Winkler)
Leave a comment