«In OpenAI bi creimus dae tempus chi sa generatzione de immàgines depat èssere una capatzidade primària de sos modellos linguìsticos nostros. Est pro custu chi in GPT-4o b’amus postu su generadore nostru prus avantzadu. Su resurtadu est una generatzione non galana ebbia ma fintzas ùtile». Cun custas pagas paràulas sa cumpangia de Sam Altman at annuntziadu s’essida de una funtzione noa riservada a sos utentes Plus, Pro, Team e Free. S’optzione, a disponimentu comente istrumentu predefinidu de su modellu mentovadu (ma si podet impreare fintzas in intro de Sora, prataforma OpenAI chi faghet vìdeos movende dae descritziones testuales), ingendrat immàgines de calidade arta «rispondende a prompt, cunversatziones e file carrigados».
In detàlliu, permitit a sos utentes de las fàghere dae su nudda o mudende·nde àteras cunforma a sos inditos frunidos. «Sa generatzione de immàgines GPT-4o – sighimus a lèghere in su comunicadu – est de primore in sa torrada cabale de su testu, sighende a minudu sos sugerimentos e isfrutende sa base de connoschèntzia intrìnseca de 4o e su cuntestu de sa chat, gasi etotu in sa trasformatzione de sas immàgines carrigadas o in s’impreu issoro comente ispiratzione visiva. Cun custas funtzionalidades est prus fàtzile a creare sas chi ais immaginadu agiudende·bos a comunicare in sa manera prus eficatze pro mèdiu issoro e trasformende sa generatzione in un’istrumentu pràticu cun pretzisione e potèntzia».
Ma totu perfetu est? Nono, e lu narant issos matessi: «Su modellu nostru no lu est. Ischimus chi a su presente b’amus paritzas limitatziones e chi las amus a risòlvere una bia a pustis de s’essida sua». In contu de trasparèntzia, totu sas creatziones produidas dae su generadore tenent in intro sos metadatos C2PA chi las identìficant comente immàgines de GPT-4o: «Amus fintzas creadu – narant – un’istrumentu de chirca interna chi impreat sos atributos tècnicos de sas generatziones pro verificare si su contenutu est de su modellu nostru». A concruos diat pàrrere de bi bìdere una garantzia: «Semus sighende·bi·la blochende rechestas pro ingendrare immàgines chi podent violare sas polìticas nostras in contu de materiale pedopornogràficu e de deepfakes sessuales».
Gianfranca Orunesu
Leave a comment