– de Salvatore Serra –
Una noa de importu pro sas limbas prus pagu ispainadas de Europa: sas Acli de Sardigna promovent “Ondras”, unu prèmiu pro reconnòshere s’impinnu sotziale e polìticu, in cada logu de su mundu, de chie traballat pro agiuare e pònnere in contu sas limbas de minoria. A pustis chi, pro deghinas de annos, s’organizatzione de ispiratzione catòlicu- sotziale aiat amparadu unu prèmiu literàriu poèticu in limba sarda, como punnat a fàghere prus mannos sos orizontes suos, pro pònnere sa chistione sarda in una guarnitza europea.
“Amus iscumproadu su bisòngiu mannu chi tenet sa sotziedade nostra de torrare a pònnere in caminu sa chistione de sa limba sarda -at naradu Frantziscu Marras, presidente regionale de sas Acli e promotore màssimu de s’initziativa- e duncas amus chircadu de seberare un’atividade chi poderat in su matessi tempus abalorare sas cosas nostras cun un’impinnu annoadu e pònnere pontes pro una redefinitzione prus pagu setoriale e prus universale. Sa de dare unu prèmiu a sos ativistas de sas limbas italianas e europeas, a duncas finas de su sardu, nos est parta un’idea bona a beru”.
Pro custa finalidade est essida a campu in Sardigna giai dae unu pagu de tempus una cummissione de espertos pro aprontare unu mètodu ratzionale e echilibradu de presentatzione e valutatzione de sas candidaduras pro sa prima editzione. Pro agiuare in custa fase ant cramadu a Giuseppe Corongiu, iscritore e ativista dae tempus meda de sas batallas linguìsticas, Nicolò Migheli, sotziòlogu e autore de trasmissiones radiofònicas RAI in sardu, e Maria Antonietta Piga, esperta de limba sarda e giornalista televisiva. Sa cummissione at giai traballadu pro fàghere nàschere una retza de sas minorias, interessende sos leader de opinione de cada grupu, cun sa finalidade de seberare una sèrie de nùmenes de sinnalare e premiare intro de su cumintzu de s’istiu. “A s’ispissu a sos ativistas de custas limbas -at pretzisadu Marras- nointames s’impinnu mannu issoro, sos mèdios de informatzione no los càrculant, e non tenent in vida su reconnoschimentu giustu pro su traballu issoro. Cun su prèmiu nostru amus a chircare in carchi manera de pònnere remèdiu a carchi tortu, cun sa punna de sensibilizare sas comunidades locales a un’impreu nou e modernu de sas chi lis narant limbas minoritàrias e regionales ”.
Ondra est unu tèrmine de su sardu literàriu chi cheret nàrrere “onore”, “reconnoschimentu”, “bàntidu” in su sentidu de s’atributzione de calidade a una pessone o a una cosa. Sa paràula giusta pro rapresentare su chi sas Acli cherent fàghere.
Leave a comment