Isetènde s’udièntzia de convàlida in dae in antis de su GIP de su Tribunale de Aristanis, abarrat in su càrtzere de Màssama, cun s’acusa de omitzìdiu volontàriu, Giorgio Meneghel, 51 annos de Tzeddiani, chi sàbadu a mangianu at mortu a sa pobidda, Daniela Cadeddu, 51 annos de Crabas, e a pustis at cramadu sos Carabineris de su Cumandu provintziale de Aristanis chi l’ant arrestadu.
Sa notomia, fata eris in s’Istitutu de Meighina legale de su Policlìnicu Universitàriu de Casteddu, at cunfirmadu su chi at contadu su mortore a sos incuirentes. At corfidu sa fèmina in su sonnu, a conca, cun unu marteddu, ochiende·la. Giorgio Meneghel e Daniela Cadeddu fiant iscrobados e istaiant in domos diversas ma in su matessi palatu.
Sos Carabineris de su Nùcleu investigativu de su Cumandu provintziale de Aristanis e sos ispetzialistas de su RIS de Casteddu ant collidu àteros elementos pro cumprèndere comente sunt andadas sas cosas e cunfirmare o bortulare su chi at naradu s’òmine pustis s’arrestu.
Su feminitzìdiu at iscunnortadu sas comunidades de Tzeddiani e de Crabas ue, in su giru de pagos meses, bi nd’at capitadu tres.
Mariantonietta Piga