-de Sarvadore Serra-
Su duos de cabudanni de su 1813, in Casteddu, ant impicadu a s’Avocadu Sarvadore Cadeddu, organizadore de sa congiura de Palabanda. Est istadu s’epìlogu tràgicu de su perìodu revolutzionàriu sardu.
In custu perìodu – dae ùrtimos de su 700 a cumintzos de s’800 – in Casteddu s’aiat formadu unos cantos sòtzios giacobinos. Unu de custu fiat su chi si naraiat Palabanda, dae su nùmene de su logu in ue faghiat sas reuniones.
Su 30 de santugaini de su 1812 deviat mòere dae cue s’ùrtimu tentativu insurretzionale contra a sos Savojas Ma sas cosas sunt andadas male ca b’at àpidu, comente càpitat a s’ispissu, traitores.
Subra de custa acuntèssida, chi nch’at giutu a sa morte de sos cungiurados prus importantes, b’at paga documentatzione a beru, fintzas in sos registros segretos, ca sos atos de su protzessu sunt iscumpartos belle deretu da sos archìvios.
Calicunu narat chi sa documentatzione si nche l’ant leada in fatu sos Savojas, s’ùrtimu Umberto II in su disterru suo in Portogallu.
S’istùdiu prus cumpletu l’at fatu sa professora Maria Pes, in su libru “La rivolta tradita. La congiura di Palabanda e i Savoia in Sardegna, ed. Cuec, Cagliari 1994”.
Custu est su chi s’ischit.
In una corte de Palabanda, de propiedade de s’Avocadu Sarvadore Cadeddu, si reuniaint sos cospiradores: in cue issos s’ispassiaiant, arresonaiant de polìtica, de su predomìniu in tzitade de sos piemontesos chi fiant bènnidos infatu a Vittorio Emanuele I, custrintu a istare in Sardigna pro more de s’ocupatzione napoleònica de sos territòrios continentales, e chi sa presèntzia sua aiat incausadu un’aumentu de sas tassas.
Su discuntentu de sa gente fiat aumentadu pro curpa de su vitzerè Carlo Felice (chi li naraiant a paralùmene Carlo Feroce), chi est abbarradu fintzas a su 1806. Però issu, a pustis de su primu perìudu de repressione, si fiat ligadu a tzertos ambientes de Casteddu, acuntentende a calicunu in sa “Reale società agraria”, in sos asilos, in sos collègios, faghende carchi cosighedda pro sa sanidade, dende carchi bursa de istùdiu…
Ma pustis est arribbadu su 1812, chi est istadu s’annu de sa gana e de s’epidemia de pigota, s’annu chi sa carestia at fatu sos dannos prus mannos. Fiat fintzas s’època chi sas prefeturas cumintziant a praticare su controllu issoro in su territòriu e chircaiant sena profetu de organizare sa leva de sos sardos. Sa zeca nche l’aiant tramudada in Sardigna; aiant abolidu su dinare in pabiru e ant coniadu petzi monedas de prata.
In custu cuntestu – cun unu pòpulu chi fiat giai resessidu a si liberare dae sos istràngios ma chi fiat torradu a suta de su cumandu issoro, cun sos patriotos impicados e espostos in sas ghennas de sas tzitades o mortos in su disterru o in presone, cun sa gente morende de gana e cun unu muntone de tassas de pagare, cun sos postos a sos sardos promissos e non dados, fiat crèschida s’idea de unu bortulamentu de s‘òrdine costituidu”, de un’àtera dispatzada de sos piemontesos, forsis definitiva, dae bandas de sa famìlia de s’Avocadu Sarvadore Cadeddu (paris cun issu sos fìgios Gaetanu e Luisi e su frade Giuanne), Giosepe Zedda, professore de sa facultade de Lege, sos Avocados Frantziscu Garau e Antoni Massa, su preìderu Antoni Muroni e àteros professionistas famados de Casteddu di Cagliari. Ma fiat rapresentadu fintzas su pòpulu, cun su peddàrgiu Remundu Sorgia, su maistru de pannu Giuanne Putzolu, su piscadore Innàssiu Fanni e su paneteri Giagu Floris.
S’insurretzione fiat previdida pro sa note intre su 30 e su 31 de santugaini. Deviant ocupare sas ghennas de Stampace e Villanova, intrare in su bighinadu de sa Marina dae sa porta de Santu Austinu, lassada aberta dae sos sordados de guàrdia chi fiant de acordu, pro cunchistare, in fines, su bighinadu de su Casteddu, arrestare Giagu Pes de Villamarina, cumandante militare de sa tzitade, e dispatzare sos funtzionàrios pùblicos e sos cortesanos, chi fiant arruinende sa Sardigna.
Ma s’avocadu de su Fiscu Remundu Garau nch’at ischidu totu dae calicunu. Issu at informadu su re e Villamarina, su cale at allertadu sos militares a sos òrdines suos.
Sa rebellia, duncas, l’ant truncare in su nàschere.
Sa repressione est istada de sas peus. Custas sunt istadas sas cundennas:
– cundennados a s’impicu: Sarvadore Cadeddu, Remundu Sorgia, Giuanne Putzolu
– cundennados a morte in contumàtzia Gaetanu Cadeddu, Giosepe Zedda, Frantziscu Garau, Innàssiu Fanni
– cundennados a s’ergàstulu: Giuanne Cadeddu, Antoni Massa
– cundennados a su remu a vida: Giagu Floris, Pascale Fanni
– disterrados sos àteros.
Dae tando est cumintzada a beru sa restauratzione.
Ligàmenes:
http://diaryofboard.blog.tiscali.it/2010/10/30/la-rivolta-di-palabanda/
http://www.democraziaoggi.it/?p=2594
https://salimbasarda.net/istoria/carlo-feroce-de-su-caminu-nostru-ischimus-chie-fiat/