Ocannu is mundiales: totus allenadores, totus linguistas!

de Luisu Wittgenstein

Lòmpidos sunt is mundiales de fùbalu! E, che a semper, in is tzilleris e in is pratzas de Sardigna totus si fùrriant a allenadores, mancari de una natzionale chi non siat s’isssoro. «Bidu dd’as Sìrigu? Tocat a ddu fàghere giogare titulare deretu ca a Buffon ddi faghet 10 a 0!» «Pirlo est dae cando teniat 12 annos chi naro ca est su mègius giogadore italianu!» «Sa Germània est s’iscuadra prus forte ma su Brasile at a bìnchere!»

Oreris de ònnia bidda non s’arroschent de s’immaginare in ue, a s’oru de su campu, a ghiare s’iscuadra issoro a sa vitòria de su mundiale, aici comente a pipios si pensaiant de èssere is giogadores chi signaiant su gol detzisivu de sa finale.

Ma is bisos mundiales non sunt isceti pro is apassionados de fùbalu e is oreris de cada genia ant agatadu pratzas e tzilleris medas prus mannos in internet e in is mèdia sotziales.

E duncas a cada ora de cada die si podent lèghere “espertos” de cumplotos chi agatant provas noas de su fatu ca su guvernu mundiale si bolet totus mortos o tzeracos, “mèigos” de fama mundiale chi ònnia mesora agatant sa manera pro sanare dae totus is maladias, “polìticos” de cada arratza chi iscoberint carchi fura o carchi catzada dae parte de is polìticos de is àteros partidos.

Lampu! E is “linguistas” in ue sunt? Non si pighet sa timoria, bi sunt issos puru! E pro si nono comente ddu passant su tempus, no dd’istrobet su traballu, no! E duncas, ¡vamos ganhar a língua mundial! E totus linguistas in sos tzilleris de sa retza. «Su sardu est tropu setentrionale!» «Sa macruvariedade istòrica cun traditzione orale de iscritura.» «Sa mesania est prus mesana!» «Bolimus un’istandard ùnicu cun duas normas chi permitant 3 formas cun 4 variatziones chi permitant 5 pronùntzias chi serbant a 6 variedades chi permitat a totus e nois chi semus in 7 de iscrìere comente nos praghet.» «Bolimus una votatzione pro detzìdere in manera democràtica. E chie dd’at detzìdidu? Votamus pro detzìdere si votare!»

E aici, in tempus de basca e de orroschèntzia, totus agatant sa manera chi ddis praghet de prus pro bi passare s’ora, ca in s’istade sa die est tropu longa! E biados cuddos chi traballant ca a su mancu pro carchi ora si pàusant dae èssere allenadores totu die…

foto leada dae sa retza