Novas pro sos utentes chi impreant su Chromebook. Est essida dae pagas dies sa versione noa de su sistema operativu pro sos computadores de Google. ChromeOS 124 si narat, e sighit sa pretzedente ChromeOS 123 chi giai daiat unas cantas optziones de personalizatzione pro sos dispositivos in chistione.
Medas sas funtzionalidades chi sos utentes podent iscobèrrere cun sa versione noa. B’est Snap Groups (giai disponìbile in ChromeOS 121) chi, imbetzes de gestire sas aplicatziones sìngulas, permitit de nche colare dae unu grupu a un’àteru organizende·las in categorias. Custa funtzionalidade podet bantare una configuratzione prus lestra de s’ischermu partzidu: cando si incarcat subra de una ventana in unu ladu de s’ischermu, su sistema operativu ammustrat àteras ventanas abertas pro s’àtera ala. Gasi at a èssere possìbile a seletzionare sa ventana punnada sena bisòngiu de l’abèrrere manualmente pro la positzionare.
Sa funtzione Quality of Service oferit una mègius prioritizatzione de su tràficu de datos de sas aplicatziones de giogu e de videocunferèntzia in sas retes Wifi prenas. Gràtzias a custa novidade, sa riprodutzione at a èssere prus flùida cun impatu positivu pro su chi pertocat sos giogos. Pro nàrrere, si calicunu giogat in sa matessi rete Wifi in ue b’at àtere chi iscàrrigat unu file, sa rete at a garantire sas resursas bastantes pro chi s’esperièntzia de giogu iscurrat. Matessi funtzionamentu in contu de aplicatziones de videocunferèntzia s’in casu sa rete siat prena.
In ChromeOS 124 ant aumentadu sa mannària de su cursore de su mouse. S’utente, semper e cando, podet mudare sa dimensione e seberare sa chi cheret. Un’àtera novidade in contu de mouse est su megioru de s’acopiada intre mouse wireless: si b’at cumpatibilidade cun Fast Pair, est possìbile a lu crobare pro mèdiu de unu clic ebbia a pustis de l’àere acurtziadu a su computadore.
Pro colare a sa versione noa, s’utente podet andare a “impostazioni”, “Informazioni su ChromeOS”, “Controlla gli aggiornamenti” e aviare su protzessu.
Gianfranca Orunesu
Leave a comment