Su 28 de santandria ddo’at àpidu su primu atopu de su guvernu nou de Nova Zelanda. Est un’esecutivu de coalitzione intre sos partidos de destra National Party e New Zealand First e sos libertàrios de ACT (Associaton of Consumers and Tax Payers).
Su primu ministru est Christopher Luxon, de su National Party, su partidu de majoria relativa. Winston Peters , de New Zealand First, e David Seymour, de ACT, ant a fàghere a borta a borta pro su ruolu de vitze primu ministru.
Cumintzat Peters, chi est finas ministru de sos Afàrios Èsteros e a metade legisladura, intre degheoto meses, at a intrare Seymour, chi est finas ministru de sa Regulamentatzione.
In su primu cussìgiu de gabinete Winston Peters at ammentadu ca unu de sos impignos de su guvernu est abbandonare s’usu obligatòriu de su maori in sos servìtzios de interessu pùblicu, incruida sa radiotelevisione de istadu, e de torrare sos nùmenes de sas istitutziones pùblicas in inglesu ebbia.
In prus su lider de New Zealand Firts at acusadu de corrutzione s’imprenta neozelandesa dae parte de su guvernu in essida, chi aiat istituidu su fundu de giornalismu de interessu pùblicu chi at retzidu 55 milliones de dòllaros de s’istadu.
In ogna modu su guvernu at presentadu giai 49 puntos chi pertocant interventos urgentes de fàghere in sas primu 100 dies.
Sunt caraterizados dae deregulamentatzione a livellu econòmicu e fiscale e penas prus malas in su setore de s’òrdine pùblicu, in ue ant detzìdidu de abbandonare su progetu de su guvernu laburista de abbacare sa populatzione penitentziària.
In su setore de su trasportu privadu, intre sas àteras cosas, no ant a artziare sas tassas de sos carburantes e no ant a sighire a abbacare sos lìmites de velotzidade in sas carreras.
In campu sanitàriu ant a istabilire si adotare o nono normas sanitàrias de s’Organizatzione Mundiale de sa Sanidade, dende prioridade a s’interessu natzionale.
(gianni muroni)
Leave a comment