Sas Audio Overview sunt una casta de tzarradas, chi lis narant “deep dive”, intre duas boghes ingendradas dae s’intelligèntzia artifitziale chi faghent resumu de sos argumentos crae de unas cantas fontes carrigadas in NotebookLM de Google. In pagas paràulas dae unu testu nde podet essire unu podcast. S’istrumentu no est nou. Sa novidade est chi como sa cosa funtzionat fintzas in italianu. O mègius, como sos resumos àudio ingendrados movent dae sas limbas impreadas in intro de su chatbot Gemini, e s’italianu intro de custas.
Est bastante a intrare a notebooklm.google, annànghere unu documentu testuale intre sos formados atzetados (fintzas unu pdf) e, dae cue, generare unu resumu àudio de cantu iscritu. No est totu: cando semus generende su podcast, ma fintzas a pustis de l’àere fatu, est possìbile a porrogare a Gemini pro nch’intrare prus a intro de sos contenutos carrigados.
In rete b’at giai unu muntone de esèmpios de podcast fatos de custa manera e fintzas sa calidade est bona sende chi sa tzarrada paret fata a beru dae duas persones reales. Su chi si podet intèndere sunt boghes chi istorchent finamentas sos pasos e sas modulatziones de sa comunicatzione verbale chi a beru las collimus cando iscurtamus una trasmissione podcast.
Ma fintzas sena chèrrere lòmpere a su fràigu de unu podcast, custu traste lu diamus pòdere impreare carrighende registratziones de letziones, capìtulos de libros e artìculos de chirca. NotebookLM podete generare sas Audio Overview suas pro acrarire in forma sèmplitze cuntzetos cumplessos afortiende sa cumprensione nostra.
Podimus fintzas carrigare notas de brainstorming, chircas de mercadu e in contu de cuncurrèntzia. NotebookLM identìficat sas tendèntzias, bogat a campu ideas noas e iscoberit oportunidades cuadas. Totu custu, como, finas in italianu. Pro sa limba sarda cheret chi isetemus e no ischimus pro cantu.
Gianfranca Orunesu
Leave a comment