S’istòria de Giulio Regeni la connoschimus. Nàschidu su 15 de ghennàrgiu de su 1988, 28 annos teniat cando l’ant mortu. Fiat unu chircadore italianu de s’Universidade de Cambridge chi nch’istaiat in Egitu e, in cussos momentos, fiat faghende chircas in contu de traballadores e sindacadu. In su Càiru s’ambiente pariat dèghidu pro sa faina sua, sende chi su materiale e sas dinàmicas de s’istùdiu suo brotende fiant dae unu cuntestu chi moviat dae su chi amus connòschidu comente beranu àrabu.
Su 25 de ghennàrgiu, duncas cun sos annos in pessu lòmpidos, est su die de sa furriada niedda de sa vida sua: dae tando non s’at ischidu prus nudda de issu finas a su 3 de freàrgiu, cando agateint sa carena sua torturada in una carrera perifèrica de sa capitale egitziana. Ischimus finamentas chi giai dae comintzu sas indàgines fiant fartosas e prus chi non complicadas, cun su guvernu de Al Sisi chi deretu negheit de b’àere pigadu parte, mancari chi fiat evidente chi a su pitzocu l’arresteint e lu tortureint sos servìtzios de seguresa egitzianos.
Su mese de freàrgiu de s’annu coladu, a pustis de una sèrie de avantzamentos intreverados a firmadas noas, est comintzadu in sa prima Corte de Assise su protzessu contra a sos bator 007 egitzianos acusados de su secuestru e de sa morte de su pitzocu. In custu tempus b’at àpidu ocasione de iscurtare testimòngios e de achirire documentatzione noa pro àere una visione prus crara de s’acontèssida. Ma est cosa chi non bastat pro sos de s’unda groga, sa comunidade de sos amigos de su chircadore e de sos ativistas a costàgiu de sa famìlia sua.
Sàbadu su 25 de ghennàrgiu, cando est rutu s’anniversàriu de s’iscumparta de Regeni, b’at àpidu in Fiumicello (in provìntzia de Ùdine) un’ammentu cun 37 luminos. Trintasete che a sos annos chi oe aiat àpidu. Dae cue petzi una rechesta: veridade.
mauro piredda
Leave a comment