Su grupu de traballu Tiny Core at annuntziadu sa de 14 versiones de sa distributzione Linux nòdida pro s’usabilidade oferta finamentas a sos elaboradores betzos chi, gasi, podent torrare a bida in un’època in ue paret cosa normale a nch’imbolare sena dolu sa cosa impreada.
Tres sas editziones a disponimentu cunforma a sas esigèntzias de sos utentes: Core (petzi lìnia de cumandu), Tiny Core (ambiente gràficu minimale), e Core Plus (prus avantzadu, s’immàgine de installatzione).
S’istrutura de Tiny Core Linux nch’istat in pagos MB (dae 17 a 248 a segunda de s’editzione) e, in prus, s’ànima (su “core”) podet girare pro intreu in sa memòria RAM; pro custu podet bantare unu tempus de carrigamentu (boot) reduidu si lu cunfrontamus cun àteras distributziones minimales.
Un’àtera caraterìstica est sa possibilidade de personalizare s’installatzione seberende – pro mèdiu de su gestore de sos pachetes – sos aplicativos chi si cherent àere in su sistema.
Sos utentes in disìgiu de proare Tiny Core lu podent iscarrigare dae inoghe: http://www.tinycorelinux.net/downloads.html
Gianfranca Orunesu
Leave a comment