Sa segunda editzione de Navigantes, s’initziativa de sa Fondazione Maria Carta, ocannu a tentu a teatru Bonifacio, in Còrsica. Su biàgiu in nave, dae Longone a s’ìsula sorre, at permìtidu a unos 350 sardos, pro su prus in rapresentàntzia de sa Gaddura, de isfilare, pagu a pustis de mesudie, cun sa bestimenta traditzionale, in sas carreras de sa bidda corsicana.
In antis ddo’at àpidu s’addòbiu intre sa delegatzione sarda e sas istitutziones locales. Pro sos sardos fiant presentes amministradores de Sìligo, Tèmpiu, Telti, Badesi, Su Palau, Trinidade e Monte. A ddos retzire ddoe fiat su sìndigu de Bonifacio Jean-Charles Orsucci.
Su primu tzitadinu at sutaliniadu s’unione intre sas duas regiones, cun una presèntza manna de sardos in Còrsica e de corsicanos in Sardigna. Issu etotu tenet una mannai de Longone.
A pàrrere de Orsucci diat tocare a traballare paris pro sa creatzione de una regione europea sarducorsicana. Cheret sighida a isvilupare sa collaboratzione culturale e cherent megiorados, semper segundu Orsucci, sos collegamentos marìtimos, bidu ca sos chi ddoe sunt como non sunt a s’artesa.
A nùmene de sos amministradores sardos at faeddadu su sìndigu de Tèmpiu Giannetto Addis, chi at reconnotu s’èsitu mannu de custa initziativa, cherta dae su presidente de sa Fondazione Maria Carta Nardo Marras. Sunt intervènnidos puru su parlamentare Paul-André Colombani, su sìndigu de Porto Vecchio Jean-Christophe Angelini e, in rapresentàntzia de s’universidade de Corte, Fabien Landron.
At coordinadu s’assessore a sa Cultura de Bonifacio Alain Di Meglio.
A coa, semper a mangianu, in sa crèsia de Santu Domìnigu, si sunt esibidos su coro Gabriel de Tèmpiu, su tenore Remunnu ‘e Locu de Bitzi, Maria Giovanna Cherchi e su grupu Canti d’Ajacciu.
A sas sete sa nave de Navigantes est torrada a Longone.
(gianni muroni)
Leave a comment