Est su primu robot chi istorchet su sistema mùsculu-ischelètricu nostru. Protoclone – custu su nùmene suo – est una creatzione de Clone Robotics, azienda polaca cun diramatziones in sos Istados Unidos chi, pro su fràigu suo, at pigadu ispiratzione dae sa sèrie televisiva Westworld.
S’andròide est ingendrende interesse mannu in s’àmbitu tecnològicu e iscientìficu sende chi tenet caraterìsticas biomecànicas particulares reales. S’ischèletru polimèricu reproduit sos 206 ossos (comente su corpu nostru) e Myofiber, una tecnologia propietària chi ìmitat su funtzionamentu de s’aparatu musculare, li permitit de fàghere movimentos naturales.
Su sistema nervosu artifitziale tenet bator telecàmeras positzionadas in cùcuru (pro sa visione), 320 sensores de pressione pro sa fortza musculare e 70 sensores inertziales pro su monitoràgiu de sas positziones articulares. Gràtzias a custa rete sensoriale, Protoclone podet reagire a sos input visivos e, pro mèdiu de unu sistema de aprendimentu automàticu connòschidu comente Telekinesis, podet imparare còmpitos noos osservende deretu sas atziones umanas e megiorare s’esperièntzia sua.
Pro su chi pertocat su sistema vasculare, custu est fatu dae una pompa elètrica de 500 watt chi pompat lìcuidos pro frunire pressione idràulica a su sistema musculare. Cumpata comente su coro de una persone, sa portada volumètrica est de 40 slpm (litru istandard cada minutu) e sa pressione nominale est de 100 psi.
In totu, s’andròide tenet 1000 fibras musculares artifitziales e prus de 200 sensores barighende·nche sos 200 grados de libertade in sos movimentos.
Clone Robotics at annuntziadu chi sos preòrdines de s’andròide los ant a abèrrere a concruos de su 2025: sa produtzione at a cumintzare cun 279 unidades (batijadas comente Clone Alpha) destinadas a una fàscia minore de mercadu.
Gianfranca Orunesu
(Immàgine dae https://www.youtube.com/watch?v=H7dhwFcuUn0)
Leave a comment