Mussegnore Frantziscu Antoni Soddu est s’Archipìscamu nou de Tàtari

Su Vaticanu at numenadu Archipìscamu Metropolita de Tàtari a Mussegnore Frantziscu Antoni Soddu, òmine connotu meda e istimadu pro èssere istadu diretore de sa Càritas Italiana. Pro Soddu, chi tenet 66 annos, cheret nàrrere a torrare a domo. Naschidu in Tzaramonte, in provìntzia de Tàtari, at istudiadu in su Seminàriu Regionale Sardu e, prima de èssere mutidu a Roma e posca in Umbria, est istadu pro annos medas sa diòtzesi turritana, tratende ingàrrigos de responsabilidade manna.

Sa nova est istada retzida cun cuntentesa dae sas autoridades de ambos logos, chi bident in Soddu una figura de profilu umanu artu e unu connoschidore fungudu de sas chistiones de su territòriu. Su sìndigu de Tàtari, Giuseppe Mascia, at mustradu su gosu de totu sa tzitade: “Retzimus cun galabera sa torrada de Mussegnore Soddu. Sa figura sua est unu ponte intre s’istòria nostra e sas isfidas de su presente. S’isperièntzia longa in sa Caritas natzionale at a èssere de profetu pro sa comunidade, chi tenet bisòngiu de ogru atentu pro sos disamparados. Semus prontos a fàghere sa parte nostra pro su bene de sos tzitadinos e de su territòriu turritanu”.

Onorada si mustrat puru sa comunidade de Tzaramonte, in ue est nàschidu s’Archipìscamu. Su sìndigu Luigi Pinna at naradu: “Pro Tzaramonte est una die istòrica. Bìdere unu fìgiu de sa terra nostra mutidu a ghiare s’Archidiòtzesi de Tàtari nos prenat de orgullu. Frantziscu no at mai ismentigadu sas raighinas suas e su ligàmene cun sa bidda est abbarradu forte in sos annos. Lu isetamus a bratzos abertos pro festare in paris”. S’isperièntzia de Terni, tzitade proada dae sas crisis industriales, nd’at torradu unu pastore de coro mannu e dìligu a su mundu de su traballu. Chie lu connoschet lu descriet comente un’òmine bonu a chistionare cun sas istitutziones e puru cun chie est a largu dae sa Crèsia.

Bobore Taras