Mùsica in Sardigna. Sa Scena est como unu giornale. Publicadu s'annuàriu 2021

“Sa Scena”, unu portale de informatzione musicale sardu nàschidu su 2017 pro initziativa de Daniele Mei, espertu e connoschidore de s’underground isulanu, est como unu giornale gràtzias a sa registratzione de sa testada in su tribunale de Casteddu. Su giornale at a abarrare in su web, ma s’assòtziu de promotzione sotziale “Sa Scena sarda” at bogadu a campu in custas dies una produtzione in pabiru cun su materiale iscritu s’annu coladu. Su “annuario 2021” cuntenet retzensiones, intervistas, rubricas e crònacas de unos cantos cuntzertos de s’iscena locale. Su libru cuntenet finamentas un’introdutzione de Giacomo Serreli, un’istitutzione in contu de giornalismu musicale. «“Sa Scena” – narat Serreli – nos at avesadu die cun die a compidare sa situatzione, a iscumproare singiales de vida de una cultura musicale multiforme cun paritzas influèntzias, a tènnere inchesos sos rifletores subra de su chi b’at a rodeu in Sardigna in contu de mùsica. Una faina chi, movende dae ascurtadas dèghidas, punnat a informare, a dare visibilidade e a fàghere essire a campu custu fermentu artìsticu pro mèdiu de novidades discogràficas, ma finamentas pro mèdiu de meledos fundudos e cunfrontos cun chie, non musitzista ebbia, òperat in s’àmbitu de sa produtzione musicale de sa regione nostra». Su libru l’ant a presentare peri sa Sardigna dae custu mese, e cras s’at a pòdere agatare in s’eventu Vinyl Sardegna in su Fabrik de Castessu. Àteras informatziones inoghe.