Sos abbolotos in Europa orientale nos ant fatu bìdere unas cantas banderas noas. Dae su ‘14 in susu sa prima chi amus bidu est sa de sa Rùssia noa, est a nàrrere sa parte de s’Ucraina chi como mutimus Repùblicas de su Donbass (Lugansk e Doneck). Sa bandera est ruja cun una rughe de Santu Andria asula. Issa paret sa rèplica de sa bandera chi sa marina russa ponet in s’àrbore de sa nae, ma ammentat finamentas sa bandera de gherra de sos Istados cunfederados de Amèrica in sa gherra contra a sos nordistas. Sos colore ruju, asulu e arbu, chi a minudu agatamus intre s’isfundu e sa rughe, sunt sos colores pan-islavos chi agatamus no in sa russa ebbia ma fintzas in sa croata, islovaca, islovena, serba e tzeca.
Sa bandera chi in custas dies sunt bentulende sos manifestantes russos contra a sa gherra in Ucraina est arba cun una banda asula in mesu, in pràtica est sa bandera russa chi at pèrdidu sa banda ruja in suta. Cunforma a su chi leghimus in sa Wikipedia italiana, issa «simboleggia la lotta per la pace e la libertà di pensiero. Il rosso, che è associato al sangue e al passato sovietico, è stato sostituito dal bianco pacifico». In sa Wikipedia inglese non b’at mentovu perunu de su ruju sovièticu: «The red on the modern Russian flag is associated not just with blood, but with its military power and authoritarian strength» («Su ruju in sa bandera russa moderna est assotziadu no a su sàmbene ebbia ma finamentas a su poderiu militare e a s’autoritarismu»). De su restu, sighimus a lèghere: «WBR [white-blue-red flag] is a historical authoritarian flag introduced by Tsarist Russia». Duncas sos manifestantes sunt mudende sa bandera zarista e bident a Putin che a unu Zar nou imperiale.
Sa bandera arba-asula-arba ammentat sa dispositzione de sas bandas de sa bandera de sos chi in Bielorùssia sunt contra a Lukashenko (arba-ruja-arba).
màuru piredda
Leave a comment