de Lìberu Istrale –
Unu brullanu chi si frimmat Mraceddu, su pèsperu de sa Die de sas Fàulas e de sas Brullas, at imbiadu unu cummentu a unu post de custu giornale. Su diretore m’at incarrigadu de bos contare chi custu, naschidu in muta bona, at postu comente postel (mail) cussa ufitziale de sa professoressa L…….., o ite si narat, de s’universidade de Casteddu. Sa redatzione non crèet a manera assoluta chi siat issa.
In tantu ca est un’istudiosa sèria e bene documentada e de custas cosas non nde faghet. Posca ca no est possìbile chi una persone educada e de giudu colet su tempus a fàghere su troll in sos blog de sos àteros pro istrubbare e andare contra a sa LSC. Eh, diat èssere cosas de macos si una dotzente acadèmica e catedràtica, chi podet iscrìere e publicare in ogni logu sos istùdios suos, si pòngiat a polemizare in sos blogs tantu pro nche colare su tempus e segare sa conca.
Deo non bi creo chi una professoressa gasi fatzat custas cosas dae annos e annòrios ca diat tocare a amìtere chi custos de sa LSC siant de a beru gasi perigulosos de devènnere un’ossessione pro custa sennora. Duncas, Mraceddu istimadu, acaba.la de pònnere s’indiritzu postel de custa fèmina chi faghes una malefatia.
Nois semus abertos a sos cummentos e contributos de totus. Ma ammenta.ti de pònnere su nòmene tuo e de firmare cun sa firma tua.
Ah…un’ùrtima cosa. Custu est unu giornale fatu in sardu e iscritu totu in sardu. Nois non bolimus èssere comente sos acadèmicos, finas cussos fallidos, chi colant totu sa vida a faeddare de limba sarda iscriende in italianu. Nois cummentos o post in italianu non nde ponimus ca b’at unu mundu de blogs a disponimentu de s’italianu e inoghe cherimus tratare sa limba nostra.
Non creo chi custu siat unu problema pro a tie. Dae cussu finas t’amus iscobiadu: ca una professoressa de cussu paru, chi iscriet semper de limba, e crìticat totu su mundu de sa limba, mesches a nois chi cherimus un’istandard normale, non creo chi no iscat iscrìere e faeddare su sardu.
Ca si custu èsseret beru, tando, diamus dèpere pònnere in contu su machine chi in Sardigna bi tenimus acadèmicos chi pontìficant a subra de una limba chi non connoschent, no iscrient e non faeddant.
Mraceddu istimadu, diat èssere una brulla tropu manna pro Prima Die de Abrile ! Totus ischint chi sos catedràticos chi sunt a pirma cun nois e cun sa LSC connochent su sardu a manera istravanada. E tando, abbarra sulenu, comente aiat naradu Renzi a Letta, torra a iscriere ma in sardu.
Si cheres èssere publicadu iscrie in custa limba.
Gasi m’at naradu su diretore de bos contare e gasi bos apo iscritu. Adiosu.
Leave a comment