No est cosa fàtzile a legiferare in contu de morte assistida. Su tema est cumplessu e dìligu e cada tentativu de lu marcare in agenda aberit sas ghennas a allegas èticas, morales, legales e sotziales sena sìntesi e concruos. B’est sa chistione de s’autonomia individuale chi non si ligat a sas cunvintziones religiosas; b’at oriolos in riferimentu a critèrios de acrarire e a abusos de evitare; b’est s’opinione pùblica e polìtica chi cheret carignada.
E pro cussu est chi in Itàlia non b’at una lege chi definat custu passàgiu, sos tempos suos, sas cunditziones suas. Nudda de totu custu mancari b’apat una sentèntzia de sa Corte costitutzionale de su 2019 narende chi, de jure, in custu Istadu est possìbile.
De facto? Martis s’11 de freàrgiu de ses annos a pustis su Cussìgiu regionale de sa Toscana at prenadu custu bòidu aprovende una proposta de lege pro regulamentare custa dispedida chèrfida. Su Parlamentu, impuntzadu dae sa Corte matessi, no l’at fatu mai e mai lu diat fàghere cun custa cumpositzione: Fratelli d’Italia, Forza Italia e Lega ant votadu contra a sa proposta aprovada, pro nàrrere.
Est sa prima bia, duncas, chi b’at una lege. In Vènetu una proposta simigiante no est colada; in Lombardia non sunt resèssidos nemmancu a nde faeddare; in Emìlia Romagna e Pùllia sa regulamentatzione de sa dispedida assistida l’ant aprovada cun delìbera de Giunta sena nde faeddare in sos Cussìgios, ma no at sa matessi fortza de su dispositivu toscanu.
Ma mancari una lege bàgiat prus de una delìbera, b’at chie nd’est pesende chistiones de incostitutzionalidade. Sas cumpetèntzias in contu de sanidade sunt in parte regionales: sa «tutela de sa salude», narat s’artìculu 117 de sa Costitutzione, est matèria de legislatzione cuncurrente. A bìdere istemus sos isvilupos e sos concruos de custa acontèssida.
Torrende a Toscana sa lege previdet sa valutatzione de una cummissione multidisciplinare e su pàrrere de su comitadu èticu cumpetente in su territòriu. Petzi a pustis tocat a s’Asl a acumprire a su disinnu (cun su patziente matessi chi podet meledare in cale si siat momentu) buschende su fàrmacu netzessàriu.
In s’immàgine una setziada consiliare in sa Regione Toscana. Diritos inconsiglio.it
mauro piredda
Leave a comment