S’Àfrica est in abbolotu e sos pòpulos suos sunt fuende in totu sas àndalas chi agatant e sos mortos, a dolu mannu, non si renesset prus a los contare.
In sas ùrtimas dies si sunt agatados degheoto carasos brusiados a pustis de unu fogu in unu padente a làcana de Grètzia e Turchia: fiant migrantes cuados chi fiant proende a bènnere a Europa. Semper in custas dies si sunt chirchende tres barcas cun prus de treghentos persones chi si sunt pèrdidas in su mare intre Senegal e ìsulas Canàrias. Est de eris su documentàriu de denùntzia de Human Right Watch chi faghet bìdere (inoghe) a craru comente sos migrantes, pro su prus de Etiòpia, benint ochidos a fusiladas dae sa bàrdia lacanàrgias de s’Aràbia Saudita.
Ocannu sunt supridos a Itàlia prus de su dòpiu de sos migrantes de s’annu coladu. Non si nde faeddat meda, pro no infadare sa Presidente noa, ma sos nùmeros denegant sa propaganda de sa dereta. In prus sas lòmpidas gasi mannas ant consumadu sos pagos fundos chi aiant arrimados pro sa gestione de custas persones e sos pagos logos sestados pro las acollire. Meloni est pensende de pònnere dinari in prus e cambiare sas règulas pro partzire sos chi faghent dimanda de asilu in sas regiones e non sighire prus su critèriu de sa cantidade de sa populatzione, ma fintzas sa densidade de sos abitantes. Sardigna e Basilicata, tando ant a èssere duos giassos in ue retzire prus de custa pòbera gente.
Custa mòvida de gente e de populatzione est una noa pro sa cantidade, ma no est un’apretu, mescamente in Itàlia. S’Istadu, pro su prus, est dae nessi bintighimbe annos chi est iscaretzende custa chistione, ma no l’at mai chèrfida leare comente un’acontèssida normale chi andat ammanigiada e contivigiada cun tinu e umanidade. Bi nde sunt mortas de persones in su Mediterràneu e, a dolu mannu, ant a sighire a mòrrere, ma custu guvernu est difìtzile chi potzat cambiare custa manera de fàghere sena pèrdere sa cara cun sos chie lu sustenet de prus.
(redatzione)
Leave a comment