Microsoft at bogadu a pìgiu Muse, sa prima IA chi faghet videogiogos. Custu programma podet generare ambientes 3D interativos e mecànicas chi sos isvilupadores podent cambiare comente cherent.
S’intelligèntzia artifitziale est lòmpida a sa de noe artes pro more de Microsoft. Su gigante tecnològicu est dae annos chi est istudiende s’aplicatzione de custu programma a sos videogiogos, ma s’impinnu suo s’est fatu prus mannu in su 2023, a pustis chi at comporadu Activision Blizzard e a pustis de sa resessida a beru manna de ChatGPT. Sa IA est una aina profetosa chi si impitat in s’indùstria, ma finas a como non fiat a tretu de cumprèndere sas netzessidades de sos isvilupadores de sos videogiogos.
Muse est su primu modellu de atzione umana e mundiale, unu traste de IA chi non solu imbentat figuras, vìdeos o boghes, ma finas ambientes in 3D cun sos cales si podet interagire cun sa pretzisione de un‘isvilupadore chi tenet annos de esperièntzia in s’indùstria. Podet bogare a campu mapas e pessonàgios cun sa fatzilidade de unu professionista, bastet chi tèngiat una base de daros manna. Sa IA finas a como fiat bona a creare disinnos pro cosmèticos e bestires o dopiàgios pro sos pessonàgios, ma semper in làcans astrintas, cun unas cantas ‘istrutziones’ chi s’isvilupadore daiat a sa IA dae su cumintzu a s’agabbu pro chi las aeret aplicadas. E si si cheriat cambiare carchi cosa, fiat capassu chi nd’essiat unu burdellu. Muse, in tames, gènerat mecànicas de giogu noas chi faghent pensare chi in palas issoro b’apat una pessone cun annos de esperièntzia e no una màchina. Su programma l’ant istruturadu impitende unas 500.000 partidas (7 annos de esperièntzia) de su viedogiogu ‘Bleeding Edge’, unu simuladore de batallas multigiogadore. Sos istudiosos ant iscobertu chi Muse podet creare secuèntzias de videogiogos 3D cumplessas chi sunt cunsistentes cun sas mecànicas preesistentes de ‘Bleeding Edge’, cun grandu diversidade in su disinnu de sos nivellos e chi permitint a sos creativos de acontzare sos particulares comente cherent.
