Est dae pagu chi amus pòdidu bìdere sa presèntzia de Meta AI in Whatsapp e in Facebook. Ma custas novas sunt giai betzas in giru de prus pagu. Como Meta AI est pronta a èssere un’aplicatzione a banda. Ma custa nova, dae cale càntaru brotat? Si controllamus in sas butegas play.google.com e apps.apple.com nos abbigiamus deretu de una frase: «Meta View is now the Meta AI app» («Meta View dae como est s’app Meta AI»). Ite fiat, a custu puntu, Meta View? Fiat s’aplicatzione mòbile ufitziale pro gestire e impreare sos otzales Ray-Ban Meta permitende su collegamentu issoro a su telefoneddu, s’importatzione de fotografias e de vìdeos, sa visualizatzione de informatziones, s’impostatzione de promemòrias e àteru.
Perunu problema pro sos utentes Meta View chi «podent gestire sos otzales issoro» dae s’app nova. «Una borta agiornada s’app – leghimus in su situ de Meta – totu sos dispositivos crobados, sas impostatziones e sos mèdios nche los tramudamus a s’ischeda noa Devices». Pro como sas funtzionalidades prus avantzadas sunt cosa chi pertocat petzi su territòriu de sos Istados Unidos. Inoghe b’at a chèrrere unu pagu de tempus e – pro sos chi pròpiu non nde bident s’ora – de passèntzia. Petzi tando s’ant a pòdere isfrutare pro intreu totu sas potentzialidades de su servìtziu de intelligèntzia artifitziale.
Est pretzisu, duncas, a nàrrere chi in Itàlia nemos tenet sa possibilidade de chistionare cun su chatbot dae sa pàgina printzipale de s’app annoada. In Usa e in Cànada imbetzes b’est fintzas s’annùntziu de un’ispàtziu sotzial, Discover. Custu si presentat comente un’agregadore de contenutos cussigiados pro si pòdere relatzionare cun àteros utentes in contu de chistiones ligadas a s’AI (pensemus a su fràigu de prompt creativos e a cosas che a custas). Luego nd’amus a ischire de prus, ma pro seguru no at a èssere s’ùrtima de sas novas in custu setore.
Gianfranca Orunesu
(Immàgine dae Wikimedia Commons)
Leave a comment