Sas dudas si sa cosa fiat lìtzita o mancu sunt duradas belle un’annu. Ma como sos produtos Meta (Facebook e Instagram) podent impreare sos contenutos in cue publicados dae sos residentes de in s’Unione europea pro dare annestru a s’intelligèntzia artifitziale Meta AI. Una novidade, sende chi in antis sa cosa pertocaiat ebbia sos paisos extra-Ue (extracomunitàriu lu narant petzi a sa gente e nemmancu a totu canta).
In contu de impreos si faeddat pròpiu de contenutos publicados, duncas cumpartzidos cun àteros utentes. Ma publicados non cheret nàrrere “post pùblicos”. Como s’atzessu diretu de Meta AI pertocat fintzas su chi publicamus limitende sa visualizatzione a chie cherimus nois. Totu cantu nche finit in su dataset. S’ùnica cosa chi nch’abbarrat in foras sunt messàgios privados. Ma nemmancu sos contenutos publicados dae sos minorennes los ant a leare in cunsideru. Est una cosa chi non si podet evitare?
Luego Meta at a imbiare a totu sos utentes suos una comunicatzione a tales chi issos etotu potzant seberare intre s’acòrdiu e s’opositzione. Cantu at a èssere cosa fàtzile galu no l’ischimus. S’annu coladu sa protzedura pariat una cursa prena de impèigos: tocaiat de imbiare una comunicatzione motivada chi posca Meta deviat valutare, duncas tocat de isetare pro iscumproare si finas custu giru at a èssere gasi. No amus a dèvere tardare meda. Unu de sos problemas sighit a èssere su de sa propiedade de sos contenutos chi medas bortas sunt de màdrighe artìstica e sunt su resurtu de unu protzessu creativu. Àteru problemaspertocat in fines a totu cantos nois chi, intreghende proenda a s’indonu a unu modellu propietàriu, amus a contribuire a sos profitos de chie giai nos est bendende in intro de su custu sistema chi gratùitu no est, mancari non paghemus pro b’istare. Prontos semus a èssere semper prus tzeracos de tziu Mark?
Gianfranca Orunesu
(Foto de Tara Winstead)
Leave a comment