Trump o s’Europa? Custa est sa duda chi ponet in pistighìngiu sa Presidente de su Cussìgiu italianu. Fàghere sa tzeraca, e cun issa s’Itàlia, a unu polìticu de dereta prus de issa pro istesiare carchi dàziu e otènnere carchi favoreddu, ma partzire a manera grae s’Europa pongende·la in dificultade manna? O, a s’imbesse, traballare in paris cun s’Europa, de s’amiga sua Von der Layen, pro fraigare una defensa comuna chi non mutzet de su totu cun sos USA e chi non potzat tòrchere tropu sos echilìbrios de su mundu? In una manera serbire a unu mere istràngiu prus de comente s’Itàlia at semper fatu, dae s’àtera fàghere s’apaghiadora in un’istitutzione chi at semper criticadu e forsis pèrdere cunsensu.
Su cumbèniu no est craru in ue potzat istare: dae un’ala, Trump no est persone chi pesat fide, leat prus de cantu podet dare, o massime a manera uguale, e lu faghet cun unu poderiu isfidiadu; S’Europa, dae s’àtera ala, est programmende gastos mannos pro armas noas, ma est fintzas su mercadu printzipale de s’Itàlia.
Ma sos pidinos non finint inoghe. Meloni tenet un’inimigu a intro de su guvernu chi est Matteo Salvini, chi no bidet s’ora de s’istichire in su Ministèriu de s’Internu pro fàghere propaganda, crèschere in sos sondàgios e chi est sustènnidu maicantu dae Trump e dae Musk. Custu ligàmene l’ant cunfirmadu e decraradu totu sos imbiados e bati-boghe de sos istadunidensos in Itàlia. Tajani, su Ministru de s’Èsteru e ghia de Forza Italia, a s’imbesse est pagu istimadu dae sos americanos, ma cun raportos fortes cun s’Europa.
Su sèberu no est fàtzile e difatis Meloni est espressende sinnos de infadu e isporòngiu, che a cussu in s’atòbiu de sos cunservadores americanos. Fintzas sa positzione de si firmare in mesu a unu badu de unu riu chi est ismanniende la ponet in arriscu e l’at cumpresu, ma fintzas s’opinione pùblica est partzida in prus de duos cantos. Amus a bìdere ite at a seberare.
Gabriele Tanda
Leave a comment